جماعت اسلامی پاکستان کے سیکرٹری جنرل اور سابق پارلیمانی لیڈر لیاقت بلوچ نے اپنے ایک بیان میں کوئٹہ میں دہشتگردی کے ہولناک واقعہ کی شدید مذمت کی ہے ۔ انہوں نے کہاکہ دشمن کا ہدف سیکیورٹی ادارے ، سکول ، ہسپتال ، مساجد اور کاروباری مراکز ہیں ۔ شہدا پوری قوم کے لیے باعث فخر ہیں ۔ بے گناہ شہیدوں کی قربانیاں رنگ لائیں گی اور پاکستان دشمن قوتیں ناکام و نامراد ہوں گی۔
لیاقت بلوچ نے کہاکہ امریکہ اور بھارت گٹھ جوڑ پاکستان کے خلاف مسلسل فعال ہے ۔ ملک کے اندر سیاسی شیرازہ بکھرا ہواہے ۔ حکمران اقتدار کی بجائے قومی سلامتی کو ترجیح دیں اور کرپشن کے خاتمہ کے لیے بلاامتیاز تحقیقات اور احتساب کے مسئلہ پر ضد اور انا چھوڑ دیں ۔ عدالتی کمیشن بنانے کے لیے متفقہ ٹی او آرز تسلیم ہو جائیں تو سیاست ، جمہوریت اور معیشت پر بے یقینی کے بادل چھٹ جائیں گے ۔ لیاقت بلوچ نے کہاکہ جماعت اسلامی عدالتی اور عوامی محاذ پر کرپشن کے خاتمہ کے لیے عوامی بیداری کی جدوجہد جاری رکھے گی ۔ آئین ،آزاد عدلیہ اور جمہوری عمل کی حفاظت ہماری ترجیح اول ہے اسی لیے ہم نظریاتی ، معاشی اور انتخابی کرپشن کا خاتمہ چاہتے ہیں۔