امیر جماعت اسلامی پاکستان سینیٹر سراج الحق نے پاکستان تحریک انصاف کے قومی اسمبلی کے بائیکاٹ کو ختم کرنے کے فیصلے کو سراہا ہے اور کہا ہے کہ وزیر اعظم کی طرف سے قوم سے اپنے خطاب اور قومی اسمبلی سے اپنی تقاریر سے اعلیٰ عدلیہ میں لاتعلقی کا اظہارپارلیمانی جمہوریت کی تاریخ پر بدنما داغ ہے جس سے قومی اسمبلی کا استحقاق بھی مجروح ہوا ہے ۔
ان خیالات کا اظہار انہوں نے اسلام آباد میں ہونے والے جماعت اسلامی کے ایک مشاورتی اجلاس سے خطاب کرتے ہوئے کیا۔سراج الحق نے کہا کہ پاکستان میں پارلیمانی جمہوریت کے بجائے خاندانی جمہوریت کا راج ہے ،اسے بدلنے کیلئے سیاسی جماعتوں کو بدلنا پڑے گا۔انہوں نے تحریک انصاف کی پارلیمنٹ میں واپسی کا خیر مقدم کرتے ہوئے کہا کہ موجودہ حکمرانوں کے احتساب کیلئے اپوزیشن کو اکٹھے ہوناچاہئے۔سراج الحق نے واضح کیا کہ معاملہ پانامہ لیکس پر کمیشن بننے یا نہ بننے کا نہیں بلکہ فوری اورسرعام احتساب کا ہے ،جس کیلئے اپوزیشن کو متحد ہوکر لائحہ عمل بنانا چاہئے ۔انہوں نے کہا کہ اگر آف شور کمپنیوں کا حساب نہ لیا گیا تو یہ سانحہ سقوط ڈھاکہ بن جائے گا۔
