بنگلہ دیشی ٹیم کے کپتان اور وکٹ کیپر بلے باز مشفق الرحیم کی فٹنس مسائل کے باعث نیوزی لینڈ کے خلاف شیڈول دوسرے اور آخری ٹیسٹ میچ میں شرکت مشکوک ہو گئی ہے۔
بنگلہ دیش کے کپتان مشفق الرحیم اگر دوسرے ٹیسٹ میں شرکت نہ کر سکے تو ان کی جگہ نورالحسن بطور وکٹ کیپر ڈیبیو کریں گے۔ مشفق الرحیم کیویز کے خلاف کھیلے گئے پہلے ٹیسٹ کے دوران ہاتھ اور گردن کی انجری میں مبتلا ہوئے تھے۔
بنگلہ دیشی ٹیم فزیو ڈین کونوے کے مطابق یہاں کے مقامی ڈاکٹرز نے بھی طبی معائنے کے بعد مشفق کو کم از کم دو سے تین ہفتوں تک مکمل آرام کا مشورہ دیا ہے کیونکہ ان کی ہاتھ کی انجری گردن کی انجری سے زیادہ تشویشناک ہے اور ایسی حالت میں ان کیلئے کھیلنا خطرناک ثابت ہو سکتا ہے، ہم چاہتے ہیں کہ ابھی انہیں مزید نگرانی میں رکھا جائے تاہم ان کی آخری ٹیسٹ میں شرکت کا حتمی فیصلہ ہونا باقی ہے۔
