مقبوضہ بیت المقدس (انٹرنیشنل ڈیسک) اسرائیل کے زیرتسلط شام کی وادی گولان کے علاقے میں اسرائیلی فوج کی جاری مشقوں کے دوران 2 فوجی ہلاک اور 4 زخمی ہوگئے۔ اسرائیلی فوج کی طرف سے جاری کردہ ایک بیان میں کہا گیا ہے کہ وادی گولان میں مشقوں کے دوران ایک فوجی گاڑی کھائی میں جا گری جس کے نتیجے میں اس پر سوار 2 فوجی ہلاک اور 4 شدید زخمی ہوگئے۔ ہلاک اور زخمی ہونے والے فوج کے افسران بتائے جاتے ہیں۔
اسرائیلی ذرائع ابلاغ کے مطابق بری فوج کے سربراہ جنرل کوبی براک نے حادثے کی تحقیقات کے لیے ایک کمیٹی تشکیل دے دی ہے۔ دوسری جانب اسرائیلی فوج کے بغیر پائلٹ 2 ڈرون طیارے فلسطین کے دریائے اردن کے مغربی کنارے کے شہروں الخلیل اور بیت لحم میں گر کر تباہ ہوگئے۔ اسرائیل کے عبرانی ریڈیو کے مطابق ’اسکائی رائیڈر‘ کسی فنی خرابی کے باعث گر کر تباہ ہوگئے ہیں۔ عینی شاہدین کا کہنا ہے کہ ڈرون طیارہ الزعتری اسکول کے قریب گر کر تباہ ہوا۔
