ضلع خیبر میں نیٹو کنٹینر پر نامعلوم افراد کی فائرنگ، ڈرائیور زخمی

خیبر(خبر ایجنسیاں)قبائلی ضلع خیبر میں افغانستان میں نیٹو فورسز کو سامان پہنچانے والے کنٹینر پر نامعلوم افراد کی فائرنگ کے نتیجے میں ڈرائیور زخمی ہوگیا۔ضلع خیبر کے ڈسٹرکٹ پولیس آفیسر حسین خان نے میڈیا کو بتایا کہ مذکورہ واقعہ تختہ بیگ چیک پوسٹ کے قریب پاکستان- افغانستان کے مرکزی بارڈر روڈ پر پیش آیا۔انہوں نے کہا کہ حملہ آوروں نے کنٹینر کو سامنے سے نشانہ بنایا اور جائے وقوع پر
پولیس کے پہنچنے سے پہلے فرار ہوگئے۔زخمی ڈرائیور کو قریبی طبی مرکز منتقل کیا گیا جہاں ڈاکٹروں کا کہنا تھا کہ وہ خطرے سے باہر ہے۔ڈی پی او نے کہا کہ پولیس نے واقعے کی تحقیقات کا آغاز کردیا ہے ا ور حملہ آوروں کی گرفتاری کے لیے تختہ بیگ کے علاقے میں سرچ آپریشن بھی شروع کردیا گیا ہے۔ڈسٹرکٹ پولیس آفیسر حسین خان نے کہا کہ حملے کے مقاصد سے متعلق کچھ بھی کہنا قبل از وقت ہے۔انہوں نے پولیس جاننے کی کوشش کررہی ہے کہ حملہ آوروں کو ہدف نیٹو کنٹینر تھا یا یہ واقعہ کسی ذاتی دشمنی کا نتیجہ ہے۔ڈی پی او نے کہا کہ یہ پاکستان اور افغانستان کو ملانے والا مرکزی راستہ ہے۔ نیٹو اور دیگر تجارتی کنٹینرز یہ راستہ استعمال کرتے ہیں۔ان کا کہنا تھا کہ نیٹو کنٹینر کے ڈرائیور کو نشانہ بنانے والے حملہ آوروں کو جلد گرفتار کیا جائے گا۔خیال رہے کہ نیٹو کے کنٹینرز اکثر مرتبہ افغانستان جانے کے لیے پاکستان کا راستہ استعمال کرتے ہیں۔پاکستان سے افغانستان جانے والے امریکی حمایت فورسز کو سامان پہنچانے والے ٹرکوں کو 18 سالوں میں اور قبائلی عللاقوں کے خیبرپختونخوا سے انضمام سے قبل حملوں کا نشانہ بنایا جاتا رہا ہے۔
نیٹو کنٹینرز پر فائرنگ