وزیر اعظم کے معاون خصوصی ڈاکٹر شہباز گل کا کہنا ہے کہ پیپلزپارٹی کی کرپشن اور بے حسی نے سندھ کو صدیوں پیچھے دھکیل دیا ہے، جیکب آباد سول اسپتال کے وارڈز میں اندھیرے اور گندگی کی حکمرانی ہے۔
ان خیالات کا اظہار انہوں نے جیکب آباد کے ڈسٹرکٹ ہیڈکوارٹر اسپتال کے دورے کے بعد اپنے ایک ویڈیو پیغام میں کیا۔
خیال رہے کہ پیپلزپارٹی کے چیئرمین بلاول بھٹوزرداری نے وزیراعظم کو چیلنج کیا تھا کہ سندھ کے اسپتال ملک کے بہترین اسپتال ہیں۔
انہوں نےپیپلزپارٹی کے چیئرمین بلاول بھٹو زرداری کے چیلنج کا جواب دیتے ہوئے جیکب آباد ڈسٹرکٹ ہیڈکوارٹر اسپتال کا دورہ کیا اور وہاں ویڈیو ریکارڈ کرکے اسپتال کی حالت زار کو منظر عام پر لے آئے۔
جیکب آباد سول اسپتال کے دورے کے موقع پر وزیر اعظم کے معاون خصوصی ڈاکٹر شہباز گل نے اپنے سوشل میڈیا اکاؤنٹ پر جاری کئے گئے ویڈیو پیغام میں کہا کہ اپنی آنکھوں سے دیکھ آیا کہ سندھ کے اسپتالوں سے بہتر تو بلوچستان کے اسپتال ہیں۔
انہوں نے کہا کہ بلاول میاں جیکب آباد ڈسٹرکٹ کا سب سے بڑا اسپتال کھنڈر کا منظر پیش کر رہا ہے، یہاں کورونا تو دور کسی عام مرض کا علاج بھی ممکن نہیں ہے۔
بلاول زرداری نے چیلنج کیاتھا کہ سندھ کے ہسپتال ملک میں بہترین ہیں؛دکھی دل سے جیک آباد ڈسٹرکٹ ہسپتال کی حالت زارپیش کررہاہوں جوPPکی گڈگورننس کااصل چہرہ ہے؛PPکی کرپشن اورنااہلی کی بدولت انسانوں سے جانوروں ساسلوک روارکھاجارہاہے
سندھ حکومت پریس کانفرنس اور وفاق پر الزامات تک محدود ہے pic.twitter.com/eDNMb2UnTl— Dr. Shahbaz GiLL (@SHABAZGIL) June 21, 2020
ڈاکٹر شہباز گل نے کہا کہ بلاول زرداری کے دعوؤں کے برعکس یہاں انسانوں سے جانوروں جیسا سلوک روا ہے، عوام گدھا گاڑی میں مریض کو اسپتال لارہے ہیں جہاں گندگی کے ڈھیر ان کا منہ چڑھا رہے ہیں،خطرہ ہے کارڈیالوجی سینٹر کی چھت کسی لمحے سر پر آن گرے۔
معاون خصوصی نے بلاول بھٹو زرداری سے مخاطب ہوتے ہوئے کہا کہ کیا آپ اپنا علاج یہاں کرواسکتے ہیں ؟نہیں تو پھر عوام کے ساتھ یہ ظلم کیوں کیا جارہا ہے۔
انہوں نے کہا کہ بلاول بھٹو زرداری نے چیلنج کیا تھا کہ سندھ کے اسپتال ملک کے بہترین اسپتال ہیں دکھی دل سے جیکب آباد ڈسٹرکٹ اسپتال کی حالت زار پیش کررہا ہوں جو پیپلز پارٹی کی گڈ گورننس کا اصل چہرہ ہے ، پیپلز پارٹی کی کرپشن اور نااہلی کی بدولت انسانوں سے جانوروں جیسا سلوک رو رکھا جارہا ہے ۔