ترک صدر رجب طیب اردگان نے دہشت گرد تنظیم پی کے کے کی شاخوں پی وائے ڈی اور وائے پی جی کی حمایت کرنے والے ممالک پر کڑی تنقید کرتے ہوئے کہا ہے کہ بیرونی ممالک کی حمایت سے دہشت گرد تنظیموں نے اپنی جڑوں کو مضبوط بنایاہے۔
غیر ملکی میڈیا کے مطابق ترک صدر نے بیش تیپے کانگریس سینٹر میں الیکٹرک پاور اسٹیشنوں کی افتتاحی تقریب سے خطاب کرتے ہوئے کہا کہ کسی دہشت گرد تنظیم کی حمایت سے کسی دوسری دہشت گرد تنظیم کیخلاف جدوجہد کرنا غلط پالیسی ہے ۔انھوں نے عالم مغرب پر تنقید کرتے ہوئے کہا کہ پی وائے ڈی ایک دہشت گرد تنظیم ہے۔ ترکی ان تنظیموں پر قابو پانے کی صلاحیت رکھتا ہے لیکن بیرونی ممالک کی حمایت سے ان تنظیموں نے اپنی جڑوں کو مضبوط بنایاہے۔
صدر اردگان نے کہا کہ پی کے کے صرف ساڑھے تین ہزار دہشت گردوں سے عبارت نہیں ہے۔ اسی طرح داعش، فیتو اور ڈی ایچ کے پی سی کے دہشت گردوں کی تعداد بھی اتنی نہیں ہے جتنی نظر آتی ہے۔ ان تنظیموں کے پس پشت مختلف طاقتیں اور منصوبے موجود ہیں۔ صدر اردگان نے دہشت گرد تنظیم فیتو کے بارے میں مغربی ممالک کو پیغام دیتے ہوئے کہا کہ مغربی ممالک جتنے دہشت گردوں کو اپنے ممالک میں پناہ دے سکتے ہیں دیں لیکن ایک دن آئے گا یہ دہشت گرد انھیں بھی اپنا نشانہ بنائیں گے ۔
