جنوبی افریقہ میں سربراہِ مملکت جیکب زْوما کے خلاف مزاحمت شدید ہوتی جا رہی ہے اور ملکی حالات کے بارے میں اْن کے سالانہ خطاب سے پہلے بائیں بازو کی اپوزیشن جماعت ای ایف ایف کے ارکان نے صدر کے مستعفی ہونے کا مطالبہ کیا ہے۔
میڈیا رپورٹ کے مطابق اپوزیشن جماعت کے ارکان نے اجلاس کے دوران زْوما کو ایک بدعنوان غنڈہ اور آئین توڑنے والا قرار دیا۔ اس پر ارکان کے درمیان مْکوں کا استعمال شروع ہو گیا اور سکیورٹی کے ارکان ای ایف ایف کے اراکینِ پارلیمان کو زبردستی پارلیمنٹ سے باہر لے گئے۔ اسپیکر نے ان تمام اراکین کو پارلیمنٹ سے باہر نکال دینے کا حکم دیا تھا۔ اس کے کچھ دیر بعد ایک اور اپوزیشن جماعت ڈی اے کے ارکان بھی پارلیمنٹ چھوڑ کر چلے گئے۔ پارلیمان کی یہ ساری کارروائی ٹیلی وژن پر براہِ راست دیکھی جاتی رہی۔
