چین کی ایک معروف میڈیا کمپنی نے روبوٹ کو بطور رپورٹر ملازمت پر رکھ لیا۔
ذرائع ابلاغ کے مطابق چین میں روبوٹس نے جہاں مختلف شعبوں میں انٹری دی وہیں اب وہ صحافت کے میدان میں بھی اپنی صلاحیتوں کا مظاہرہ کرتے نظر آئیں گے۔ اس سے قبل انسانوں کی طرح کام کرتے روبوٹ صرف سائنس فکشن انگلش فلموں کا ہی حصہ ہوا کرتے تھے تاہم اب جدید ٹیکنالوجی نے اس خواب کو حقیقت میں بدل دیا ہے اور اب زندگی کے اکثر شعبوں میں روبوٹ کام کرتے نظرآتے ہیں۔ اسی سلسلے میں چین کی ایک معروف میڈیا کمپنی نے روبوٹ کو بطور انٹرنی رپورٹر ملازمت پر رکھ لیا ہے جو چین میں ہونے والی سالانہ تقریب کی کوریج بھی کرے گا۔
انسپائر نامی یہ روبوٹ 1 اعشاریہ 2 میٹر لمبا ہے، جو بہتر انداز میں معروف شخصیات سے انٹرویو لینا اور کسی بھی موضوع کے حوالے سے ڈیٹا جمع کرنے کی صلاحیت رکھتا ہے۔ ان روبوٹس کی صحافت کے میدان میں بڑھتی ہوئی مانگ کو دیکھ کر اندازہ لگایا جاسکتا ہے کہ رپورٹرز کا مستقبل اب خطرے میں ہے۔
