امریکی صدر ڈونلڈ ٹرمپ نے کہا ہے کہ اوبامہ کے دور میں روس نے خود کو بہت مضبوط کرلیا، جعلی میڈیا کی باتوں پر دھیان دینے کی ضرورت نہیں، ہماری انتظامیہ میں کوئی اختلافات نہیں ہیں۔
غیر ملکی میڈیا کے مطابق سماجی رابطوں کی ویب سائٹ ٹوئٹر پر اپنے پیغام میں امریکی صدر ڈونلڈ ٹرمپ نے سابق صدر اوبامہ پر کڑی تنقید کی اور کہا کہ اوبامہ کے آٹھ سالہ دور حکومت میں روس نے خود کو امریکہ پر سوار کرلیا۔ روس نے اس دوران سابق صدر کو نیچا دکھایا اور خود کو مضبوط سے مضبوط تر کرتے ہوئے کریمیا پر قبضہ کیا اور اپنے میزائلوں میں اضافہ کیا۔انہوں نے اوبامہ کے ہیلتھ کیئر کے حوالے سے کہا کہ پریشانی کی ضرورت نہیں ہے،ہم ریاستوں میں تفریق ختم کر رہے ہیں جس کی وجہ سے مقابلے کی فضا جنم لے گی جبکہ فیز 2 اور تین میں ہیلتھ کیئر سسٹم لایا جائے گا۔
انہوں نے کہا کہ میں ایک نئے سسٹم پر کام کر رہا ہوں جس کے بعد جان بچانے والی ادویات کی انڈسٹری میں مقابلے کی فضا قائم ہوگی اور امریکی شہریوں کو کم قیمت پر بہتر ادویات میسر آئیں گی۔انہوں نے اپنی انتظامیہ میں اختلافات کی خبروں پر رد عمل دیتے ہوئے کہا جعلی میڈیا کو یہ موقع نہ دیں کہ وہ آپ کو بتائے کہ ٹرمپ انتظامیہ میں اندرونی خلفشار ہے، ہم سب ایک ساتھ بہت اچھی ٹیم ہیں اور بڑے بڑے کام کر رہے ہیں۔
