عمران خان قبائلی عوام سے کیے گئے وعدے پورے کریں‘ اسفندیار ولی

چارسدہ (صباح نیوز) عوامی نیشنل پارٹی کے سربراہ اسفندیار ولی خان نے کہا ہے کہ عمران خان قبائلی علاقوں کے عوام کے ساتھ کییگئے وعدے پورے کریں تب ہی وہاں امن آسکتا ہے‘ ہر بات پر یو ٹرن لینا کپتان کا خاصہ ہے‘ اس حکومت نے جتنے قرض لیے ہیں اس کی مثال70 سال میں نہیں ملتی‘ شمالی وزیرستان میں پاک فوج کے افسران کی شہادت کی پر زور مذمت کرتے ہیں‘ جس پر بھی تشدد ہو‘ ہم اس کی مخالفت کرتے ہیں‘شمالی وزیرستان میں جو دلخراش واقعہ پیش آیا ہم اس کی جوڈیشل انکوائری اور مرکزی
ملزمان کو سخت سے سخت سزا دینے کا مطالبہ کرتے ہیں‘ کپتان خود وزیرستان گئے اور اعلان کیا پی ٹی ایم والوں کے مطالبات جائز ہیں لیکن طریقہ غلط ہے‘ اب انہوں نے چپ کا روزہ رکھا ہوا ہے‘ لوگوں کے ساتھ کیا گیا وعدہ پورا نہیں ہوتا تو انہیں غصہ آتا ہے‘ اب بطور وزیراعظم یہ مسئلہ حل کریں۔ چارسدہ میں مہنگائی کے خلاف احتجاج کے دوران شرکا سے خطاب کرتے ہوئے اسفندیار ولی نے کہا کہ متوسط طبقہ معاشرے کا ستون ہے لیکن حکومت جس طریقے سے چل رہی ہے اس سے ملک میں متوسط طبقہ ختم ہو رہا ہے‘ اگر مہنگائی کا طوفان اسی طرح جاری رہا تو انقلاب کا راستہ کوئی نہیں روک سکتا۔ اسفندیار ولی خان نے کہا کہ عوامی نیشنل پارٹی مولانا فضل الرحمن کی سربراہی میں حکومت کے خلاف ہونے والی اپوزیشن کی اے پی سی کا فیصلہ ماننے کی پابند نہیں لیکن 14جون کو ججز کے خلاف ریفرنس ایشو پر وکلا اور اپوزیشن کے شانہ بشانہ کھڑے ہیں۔