فضائی آلودگی کی کمی کیلیے مضبوط اقدامات کی ضرورت ہے،محمود خان

پشاور (آئی این پی) وزیراعلیٰ خیبر پختونخوا محمود خان نے کہا ہے کہ صوبے میں فضائی آلودگی اور ماحولیاتی تبدیلی عوام کی صحت پر منفی اثرات مرتب کرنے والے دو بڑے مسائل ہیں، فضائی آلودگی کی وجہ سے صحت عامہ کی پیچیدگیاں ایڈز اور ملیریا سے بھی زیادہ خطرناک اور لوگوں کی ہلاکت کا باعث ہیں، اس لیے فضائی آلودگی کی کمی کے لیے مثبت اور مضبوط اقدامات کی ضرورت ہے۔ گو کہ صوبائی حکومت بڑھتی ہوئی ماحولیاتی اور فضائی آلودگی کے خطرات کم کرنے کے لیے بلین ٹری سونامی اور خیبر پختونخوا گرین گروتھ اقدام جیسے اہم منصوبوں پر پہلے سے کام کرچکی ہے، تاہم اب بھی اس سلسلے میں مزید کام کرنے کی ضرورت ہے۔ انہوں نے کہا کہ اسی وجہ سے صوبائی حکومت نے ائر کوالٹی مانیٹرز خریدنے کا فیصلہ کیا ہے جو پشاور اور فضائی آلودگی سے متاثرہ صوبے کے دیگر اضلاع میں نصب کیے جائیں گے۔ انہوں نے اس امر کا انکشاف پاکستان کے معروف ماہر ماحولیات اور قانون دان احمد رافع عالم سے وزیر اعلیٰ ہائوس پشاور میں فضائی آلودگی پر تبادلہ خیال کے دوران کیا۔ محمود خان نے کہا کہ مختلف نوعیت کے چیلنجز کے باوجود فضائی آلودگی کا خاتمہ صوبائی حکومت کی اہم ترجیحات میں شامل ہے، وہ اور ان کی کابینہ اس سلسلے میں سنجیدہ اقدامات کی ضرورت سے بخوبی آگاہ ہیں اور ماہرین کی معاونت سے فضائی آلودگی کم کرنے میں خصوصی دلچسپی لے رہے ہیں۔ ماہر ماحولیات احمد رافع عالم نے اس موقع پر گفتگو کرتے ہوئے خیبر پختونخوا میں فضائی آلودگی کم کرنے کے لیے اپنی مہارت اور بھرپور تعاون پیش کرنے کا یقین دلایا۔ احمد رافع عالم نے کہا کہ ملک میں اس وقت بہت سے ماحولیاتی چیلنجز کا سامنا ہے مگر بڑھتی ہوئی فضائی آلودگی کو قابو کرنا بلاشبہ ایک مشکل ترین ہدف ہے۔ فضائی آلودگی تیزی سے بڑھتی جارہی ہے، جس کے ہم سب ذمے دار ہیں۔ آلودگی کے منفی اثرات نے قلبی اور دیگر مسائل میں تیزی سے اضافہ کیا ہے، جس میں امراض قلب، فالج اور اس طرح کے دیگر خطرناک امراض شامل ہیں۔ انہوں نے کہا کہ ائر کوالٹی مانیٹر کی تنصیب سے زیادہ فضائی آلودگی کے حامل اور کم آلودگی والے علاقوں میں تمیز کرنے میں مدد ملے گی۔ ہم معلوم کرسکیں گے کہ کونسے علاقے میں فضائی صورت حال مطلوبہ معیار سے گرچکی ہے۔ ان مانیٹرز کی وجہ سے آلودگی کو کم کرنے، فضاء کو صاف بنانے، صحت دوست، شہری ترقی اور رہنے کے لیے صاف ماحول فراہم کرنے میں خاطر خواہ مدد ملے گی۔ خیبر پختونخوا کے وزیر خزانہ تیمور سلیم جھگڑا نے بھی اس موقع پر گفتگو کرتے ہوئے احمد رافع عالم کا شکریہ ادا کیا کہ انہوں نے وزیر خزانہ کی خصوصی درخواست پر پشاور کا دورہ کیا۔ وزیر خزانہ نے کہا کہ ماحولیاتی تحفظ کے اداروں کی کاوشیں اپنی جگہ جاری ہیں، تاہم صوبائی حکومت بھی فضائی آلودگی پر قابو پانے کے لیے ٹھوس اقدامات کررہی ہے۔ انہوں نے کہا کہ ہم بڑھتی ہوئی فضائی آلودگی میں کمی لانے کے لیے ہر ممکن اقدامات کریں گے اور اس سلسلے میں عوام میں بھی شعور پیدا کریں گے۔ خیبر پختونخوا فضائی آلودگی کم کرنے کے لیے قائدانہ کردار ادا کرنے کے لیے پُر عزم ہے کیونکہ ہم جانتے ہیں کہ ہم فضاء کو چھوڑ سکتے ہیں اور نہ ہی سانس لینے کے لیے ہوا خرید سکتے ہیں۔ ہم نے اسی ماحول میں رہنا ہے اور اسی فضاء میں سانس لینا ہے، اس لیے بڑھتی ہوئی فضائی آلودگی کو روکنے کے لیے بلا تاخیر اقدامات ناگزیر ہیں۔