چینی سفیر سن وائی ڈانگ کا کہنا ہے کہ چین پاکستان میں بائیوٹیکنیکل ریسرچ لیبارٹری قائم کرے گا جس کا مقصد پاکستان میں زراعت کے شعبے کو ترقی دینا ہے۔
چینی سفیرسن وائی ڈانگ نے ملتان کے دورے کے موقع پر کاٹن ریسرچ اسٹیشن کا دورہ کیا جہاں انکا اپنے ایک بیان میں کہنا تھا کہ چینی صدر نے پاکستان کاکامیاب دورہ کیا جبکہ دونوں ممالک کے درمیان برادرانہ تعلقات ہیں۔انکا کہنا تھا کہ بائیوٹیکنیکل ریسرچ لیبارٹری کے ذریعے دونوں ممالک کے سائنسدانوں کو مشترکہ تحقیق کاموقع ملے گا اوراس کے نتیجے میں دونوں ممالک کے سائنسدانوں کے درمیان تعاون بڑھے گا۔یہ لیبارٹری اعلی معیار کی کپاس کی پیداوار میں مدد دے گی۔
سفیرسن وائی ڈانگ نے پاک چین اقتصادی راہداری کے حوالے سے بات کرتے ہوئے کہاکہ اس سے دونوں ممالک کے عوام کو ہی نہیں پورے خطے کے لوگوں کو فائدہ پہنچے گا۔انہوں نے کہاکہ دونوں ممالک کے درمیان سائنس ،ٹیکنالوجی ،زراعت ،توانائی سمیت مختلف شعبوں میں زیادہ سے زیادہ تعاون بڑھایا جائے گا۔
قبل ازیں ڈائریکٹر کاٹن ریسرچ اسٹیشن ڈاکٹر صغیر نے چینی وفد کوکپاس کی ورائٹی سے آگاہ کیا جنہیں ریسرچ اسٹیشن میں تحقیق کے دوران بہتر بنایاگیا۔انہوں نے مختلف تحقیقی امور اور ریسر چ اسٹیشن کی دیگر کامیابیوں سے بھی چینی وفد کو آگاہ کیا۔وفد نے ریسرچ اسٹیشن میں مختلف پودوں کی ورائٹیز کا بھی معائنہ کیا۔
