چین کی سندھ کو توانائی اور انفرااسٹرکچر منصوبوں میں تعاون کی پیشکش

ووھان/اسلام آباد(آئی این پی )چین نے سندھ حکومت کو توانائی اور انفرااسٹرکچر منصوبوں میں تعاون کی پیشکش کردی جبکہ پیپلزپارٹی کی نائب صدر سینیٹر شیری رحمان نے بھی چینی شہر ووھان کو کراچی کا ’’جڑواں‘‘ شہر قرار دینے کی پیش کش کرتے ہوئے چینی حکام سے سندھ بالخصوص کراچی میں ووھان شہر کے طرز پر ٹرانزٹ مینجمنٹ ماڈلز کے قیام میں مدد کرنے کی خواہش ظاہر کی ہے۔ شیری رحمان جو چین میں پیپلز پارٹی کے 13 رکنی وفد کی قیادت کر رہی ہیں نے چین کے صوبہ ھوبی کی قیادت کے ساتھ ملاقات کے دوران گفتگو کرتے ہوئے کیاہے ۔ پیپلز پارٹی کی طرف سے وفد میں فیصل کریم کنڈی ، سینیٹر کریم خواجہ، سینیٹر سسئی پلیجو، ناصر حسین ودیگر شامل ہیں۔ وفد کی ووہان میں آمد پر صوبائی قیادت نے خیر مقدم کیا۔ وفد نے اقتصادی اصلاحات پر تبادلہ خیال کیا ۔ ملاقات میں شیری رحمان نے کہاکہ سندھ حکومت کیٹی بندر کو سمندری پورٹ بنانے کی خواہشمند ہے اوربے شک اس تناظر میں چینی تعاون مددگار ثابت ہوگا۔ کمیونسٹ پارٹی چین کے ممبر اسٹینڈنگ کمیٹی یو شاؤلیانگ نے کہا کہ صوبہ ھوبی کے حکام توانائی اور انفرااسٹرکچر میں سندھ کی مدد کریں گے ا ور شپنگ، تعمیراتی اور توانائی کے شعبوں میں تعاون کو بڑھایاجائے گا۔ وفد چین کے رہنماؤں اورتھنک ٹینکس سے بھی ملاقات کرے گا۔