پاکستان اور افغانستان نے دہشت گردوں کے خلاف مل کر جدو جہد کرنے اور دہشت گردی کا قلع قمع کرنے کا عزم کرتے ہوئے مشترکہ خطرات کا مل کر مقابلہ کرنے پر زور دیا ہے۔
افغانستان کے صدر اشرف غنی سے ملاقات کے بعد مشترکہ پریس کانفرنس کرتے ہوئے وزیراعظم میاں نوازشریف اور افغان صدر نے دہشت گردوں کے خاتمے کے لیے مل کر کام کرنے کا اعادہ کیا۔
افغان صدر نے کہا ہے کہ پاکستان اور افغانستان کو ایک جیسے مسائل کا سامنا ہے،دونوں ملکوں پر دہشت گردی کی جنگ مسلط کی گئی اور اب دونوں کو مشترکہ طور پر خطرات کا ڈٹ کر مقابلہ کرنے کی ضرورت ہے۔
وزیراعظم میاں نوازشریف نے کہا ہے کہ افغانستان پاکستان کا برادر ملک ہے جو افغانستان کا دشمن ہے وہ پاکستان کا دوست نہیں ہوسکتا۔افغانستان کے لیے ہمارے دلوں میں خصوصی جگہ ہے۔
انہوں نے کہا کہ جہاں دہشتگردوں کی خفیہ پناہ گاہیں ہوں گی اسے ختم کیا جائے گا اور ہمیں یقین ہے کہ ہم مل کر دہشت گردی کا خاتمہ کردیں گے۔
وزیراعظم نے کہا کہ ایک دوسرے کے خلاف اپنی سرزمین استعمال نہیں ہونے دیں گے اور کسی بھی شدت پسند گروپ کی طرف سے دہشتگردی کوسختی سےکچل دیں گے۔