امیر جماعت اسلامی کراچی حافظ نعیم الرحمن نے بلدیہ عظمیٰ کی طرف سے نئے بجٹ میں کراچی کے لیے کو ئی بڑا منصوبہ شامل نہ کر نے کی اطلاعات پر گہری تشویش کا اظہار کر تے ہوئے اسے کراچی کی عوام کے ساتھ ناانصافی قرار دیا ہے اور کہاہے کہ ڈھائی کروڑ سے زائد آبادی والے شہر کے لیے حکومت کی طرف سے کوئی منصوبہ بندی نہیں کی جارہی اور شہریوں کے مسائل میں روز بروز اضافہ ہو تا جارہا ہے ۔کراچی کے عوام بجلی ،پانی اور ٹرانسپورٹ سمیت دیگر مسائل کا شکار ہیں ۔ ایسا محسوس ہو تا ہے کہ کراچی کی عوام کا کوئی پرسانِ حال نہیں ہے اور شہریوں کو مسائل کے بھنور میں چھوڑ دیا گیا ہے۔
انہوں نے کہا کہ بلدیہ عظمیٰ کراچی کی ذمہ داری ہے کہ وہ شہر کے مسائل حل کر نے اور عوام کو سہولیات فراہم کر نے کے لیے ٹھوس منصوبہ بندی اور اقدامات کر ے اور تعمیر وترقی کے نئے منصوبے بنائے لیکن صورتحال اس کے برعکس ہے اور بلدیہ عظمیٰ کراچی کے عوام کو ریلیف دینے میں مکمل طور پر ناکا م ثابت ہوئی ہے ۔حافظ نعیم الرحمن نے کہا کہ ایک طرف یہ حال ہے اور دوسری طرف کراچی کی تباہی و بربادی کی بدترین صورتحال سپریم کورٹ کی جانب سے کراچی میں سمندری اور ماحولیاتی آلودگی پر ازخود نوٹس لینے کے حوالے سے کیس کی سماعت کے دوران سامنے آئی ہے اور سپریم کورٹ نے متعلقہ اداروں کی ناقص کارکر دگی پر سخت برہمی کا اظہار کر تے ہوئے مزید تفصیلات طلب کی ہیں ۔
حافظ نعیم الرحمن نے کہا کہ سمندر میں بڑے پیمانے پر غلا ظت اور گندگی پھینکی جارہی ہے آبی حیات تباہ ہو رہی ہے ۔ایک بھی واٹر ٹریٹمنٹ پلانٹ صحیح طور پر کام نہیں کر رہا ۔بر ساتی نالوں پر عمارتیں تعمیر ہیں ۔لوگوں کو پینے کا پانی میسر نہیں ہے ۔ حافظ نعیم الرحمن نے کہا کہ سپریم کورٹ کا یہ سوموٹو ایکشن ایک خوش آئند عمل ہے ۔امید ہے کہ سپریم کورٹ متعلقہ اداروں کی سرزنش کرے گی اور اُن کو ہدایت دے گی کہ وہ اپنی کار کردگی کو بہتر بنائیں اور غفلت اور لاپرواہی ترک کریں ۔ حافظ نعیم الرحمن نے کہاکہ کراچی پر گزشتہ 25سالوں سے مسلط رہنے والوں نے عوام کے مسائل حل کر نے کے لیے کچھ نہیں کیا اور شہریوں کے بنیا دی اور دیرینہ مسائل آج بھی جوں کے توں ہیں۔
