وزیراعلیٰ سندھ سید قائم علی شاہ نے بجلی بحران کے حل کے لئے کے الیکٹرک کو 800 ٹیمیں تشکیل دینے کی ہدایات جاری کر دی ۔ وزیراعلیٰ نے قانون نافذ کرنے والے اداروں کو احکامات جاری کرتے ہوئے کہا ہے کہ کے الیکٹرک کی ٹیموں کو تحفظ فراہم کیا جائے ۔
وزیراعلیٰ سندھ سید قائم علی شاہ کی زیرصدارت بجلی بحران پر اہم اجلاس ہوا ۔ اجلاس میں کے الیکٹرک کے حکام ، سوئی سدرن کے حکام ، صوبائی وزیرخزانہ مراد علی شاہ ، وزیربلدیات شرجیل میمن ، چیف سیکریٹری سندھ اور دیگر افسران نے شرکت کی ۔ اجلاس سے خطاب کرتے ہوئے وزیراعلیٰ سندھ نے کے الیکٹرک کو ہدایات جاری کی کہ وہ بجلی کی پیداوار 600 میگا واٹ 800 میگاواٹ تک لائے ۔ اس موقعے پر وزیراعلیٰ سندھ نے بجلی اور پانی بحران کے خاتمے کے لئے کمشنرکراچی شعیب احمد صدیقی کی سربراہی میں کمیٹی قائم کی ۔ وزیراعلیٰ نے کے الیکٹرک کو فنی خرابی کو ٹھیک کرنے کی ٹیمیں 6 سو سے بڑھا کر 8 سو کرنے کی ہدایت کی ۔ سید قائم علی شاہ نے کہا ہے کہ ڈپٹی کمشنرز اور ریجنل افسران کے الیکٹرک کی ٹیموں کے ساتھ ملکر فالٹ درست کریں گے ۔ وزیراعلیٰ سندھ نے سوئی گیس انتظامیہ کو احکامات دیتے ہوئے کہا کہ کہ سوئی سدرن پاور سیکٹر کو گیس کی فراہمی یقینی بنائے ۔