دفتر خارجہ کےترجمان قاضی خلیل اللہ نے کہا ہے کہ ایم کیوایم سے متعلق برطانوی نشریاتی ادارے کے الزامات کا نوٹس لیا ہے اور متعلقہ وزارتیں بی بی سی کی رپورٹ کو دیکھ رہی ہیں۔
ہفتہ وار پریس بریفنگ دیتے ہوئے انہوں نے کہا کہ ایم کیوایم پر لگنے والے الزامات سے متعلق رپورٹ کو دیکھا جارہا ہے اور کسی بھی نتیجے پر پہچنے سے پہلے بی بی سی کی رپورٹ کا مکمل جائزہ لیا جائے گا۔
ترجمان دفتر خارجہ کے مطابق زید حامدکو2 ہفتے قبل سعودی عرب میں گرفتار کیا گیاہے اور ان کی رہائی کے لیے پاکستانی دفتر خارجہ اقدامات کررہا ہے۔
انہوں نے کہا کہ جموں کشمیر میں جغرافیائی تبدیلی اقوام متحدہ کے قراردادوں کی خلاف ورزی ہے۔
قاضی خلیل اللہ کا مزید کہنا تھا کہ پاکستان ایک ذمہ دار ملک ہے اور اپنی عالمی ذمہ داریوں سے پوری طرح آگاہ ہے جب کہ اقوام متحدہ کمیٹی پاکستان کے اقدامات کی معترف ہے۔
