رانا ثناءاللہ کا کہنا ہے عمران خان کے پی کے سے کالاباغ ڈیم پر قرارداد منظور کرائیں پنجاب قرارداد پاس کرچکا ہے ۔ کہتے ہیں پنجاب میں 20 ستمبر کو بلدیاتی انتخابات کا پہلا مرحلہ شروع ہو گا ۔
لاہور میں میڈیا سے گفتگو کرتے ہوئے وزیرقانون پنجاب رانا ثناءاللہ کا کہنا تھا پنجاب حکومت کالاباغ ڈیم بنانے کے حق میں ہے اور اس کے پنجاب اسمبلی پہلے ہی قرارداد منظور کرچکی ہے ۔ عمران خان کو چاہیے کہ کالاباغ ڈیم کے لئے خیبرپختونخوا سے قرارداد پاس کروائیں ۔ رانا ثناءاللہ کا کہنا تھا سیلاب سے سب سے زیادہ متاثر ہونے والا صوبہ خیبرپختونخوا ہے جہاں دیگر نقصانات کے ساتھ ساتھ اب تک 7 اموات بھی ہو چکی ہیں ۔
پنجاب میں بلدیاتی انتخابات کے حوالے سے گفتگو کرتے ہوئے وزیرقانون پنجاب راناثناءاللہ کا کہنا تھا پنجاب میں بلدیاتی انتخابات بروقت ہوں گے اور 20 ستمبر کو بلدیاتی انتخابات کا پہلا مرحلہ شروع ہو گا۔ ان کا کہنا تھا سیاسی جماعتوں کے ساتھ آزاد امیدوار بھی بلدیاتی انتخابات میں حصہ لیں گے۔