سینیٹر سراج الحق کا کہنا ہے کہ الیکشن کمیشن کو چاہیئے کہ وہ آئندہ انتخابات سے قبل ان کے سدبات کیلئے موثر اقدامات کرے ۔ جوڈیشل کمیشن کی رپورٹ کو کسی کی ہار اور کسی کی جیت بنانے کے بجائے الیکشن ریفارمز سامنے لائے اور بد انتظامی میں ملوث اہلکاروں کا احتساب بھی کیا جائے ۔
امیر جماعت اسلامی پاکستان سینیٹر سراج الحق کا اپنے ایک بیان میں پنجاب میں مرحلہ وار بلدیاتی انتخابات کرانے کے فیصلے پر اپنے تحفظات کا اظہار کرتے ہوئے کہنا تھا کہ بلدیاتی انتخابات مرحلہ وارکروانے اور مخصوص سیٹیں براہ راست عوام کے بجائے منتخب ممبران کے ووٹوں سے پر کرنے کے فیصلے سے دھاندلی ، لالچ ،طمع اور خوف کے ذریعے منتخب بلدیاتی نمائندوں کی خرید و فروخت کا دروازہ کھول دیا گیا ہے اورعوام کے حق نمائندگی پر ڈاکہ ڈال کرانہیں ووٹ کے حق سے محروم کیا گیا ہے۔
سراج الحق کا کہنا تھا کہ جہاں سینیٹ جیسے اعلیٰ ترین قانون ساز ادارے کے انتخابات میں اراکین اسمبلی کی کروڑوں اور اربوں روپے کی بولیاں لگتی ہوں وہاں ویلیج کونسل اور یونین کونسل کی سطح پرہارس ٹریڈنگ کو کیسے روکا جاسکتا ہے ۔انہوں نے مطالبہ کیا کہ حکومت پنجاب فوری طورپر فیصلے واپس لے اور اگر مخصوص سیٹوں پر بالواسطہ انتخاب ضروری ہے تو پھر متناسب نمائندگی کے ذریعے سیاسی جماعتوں کو ملنے والے ووٹوں سے نمائندوں کا انتخاب کیا جائے۔
امیر جماعت اسلامی نے کہنا تھا کہ حکومت نے بلدیاتی انتخابات میں اپنی مرضی کے نتائج حاصل کرنے کی طرف پیش قدمی شروع کردی ہے جبکہ کہ حکومت کو چاہیئے تھا کہ شفاف اور غیر جانبدار انتخابات کی راہ ہموارکرنے کیلئے ان تمام ہتھکنڈوں سے کنارہ کشی اختیار کرلیتی جن سے انتخابات پر عوام کا اعتماد متزلزل ہوتا ہے۔ موجودہ حالات میں ضروری تھا کہ حکومت بلدیاتی انتخابات کو صاف و شفاف اور غیر جانبدار بنانے کیلئے وہ تمام اقدامات کرتی جن سے عوام کا اعتماد بحال ہوتا مگر لگتا ہے کہ حکمران ہر حالت میں اقتدار پر قابض رہنا چاہتے ہیں۔
جوڈیشل کمیشن کی رپورٹ پر تبصرہ کرتے ہوئے سینیٹر سراج الحق نے کہا کہ آئندہ انتخابی نظام کو بااعتماد بنانے، عوام کا اعتماد حاصل کرنے اوردھاندلی کے الزامات سے بچنے کیلئے ضروری ہے کہ تمام جماعتوں کی مشاورت سے انتخابی اصلاحات کی جائیں اور الیکشن کمیشن کوان اصلاحات پر سختی سے عمل کرنے کا پابند بنایا جائے۔
امیر جماعت اسلامی پاکستان سینیٹر سراج الحق کا مزید کہنا تھا کہ 2013ءکے انتخابات پر قریبا تمام جماعتوں کے تحفظات تھے اور سب جماعتوں کی مشاورت سے ہی جوڈیشل کمیشن قائم کیا گیا تھا ،انہوں نے کہا کہ سیاسی جماعتوں کو جلسے جلوس اور احتجاج کے حق سے محروم نہیں کیا جاسکتا ، اپنے مطالبات کے حق میںجلسے جلوس اور ریلیوںکے ذریعے عوامی تائید حاصل کرنا جمہوریت کا حسن ہے ۔انہوں نے کہا کہ جوڈیشل کمیشن کی رپورٹ میں انتخابی نظام میں جن خامیوں کی نشاندہی کی گئی ہے انہیں فوری دورکرنے کی ضرورت ہے۔
