ایف پی سی سی آئی کے دفتر میں ہونے والے تاجر اجلاس نے مشترکہ اعلامیہ جاری کردیا ۔ اعلامیے کے مطابق حکومت کے ساتھ مذاکرات کے لئے 36 رکنی مشاورتی کونسل قائم کرنے کا فیصلہ کیا گیا ۔
فیڈریشن آف پاکستان چیمبرآف کامرس اینڈ انڈسٹریز کے دفتر میں ملک بھر کے تاجروں کے مختلف دھڑوں کا اجلاس ہوا ۔ اجلاس میں حکومت سے مذاکرات کے لئے 36 رکنی مشاورتی کونسل قائم کرنے کا فیصلہ کیا گیا ۔ اجلاس میں نعیم میر ، محبوب سرکی ، خالد پرویز ، رزاق ببر ، حاجی عبدل خان ، اورخواجہ افضل سمیت تاجروں کے دیگر دھڑوں نے شرکت کی ۔
اجلاس سے خطاب کرتے ہوئے خالد پرویز کا کہنا تھا تاجر کسی صورت ودہولڈنگ ٹیکس ادا نہیں کریں گے اور اگر حکومت نے مذاکرات کرنے تو پہلے ٹیکس واپس لے ۔ خالدپرویز کا کہنا تھا تاجروں کے تمام دھڑے مشاورتی کونسل کے فیصلوں پر عمل کرنے کے پابند ہوں گے ۔ ان کا کہنا تھا تمام تاجر برادری ایف بی آر کے ریجنل دفاتر کے باہر 18 اگست کو احتجاج کرےگی ۔
تاجر رہنما نعیم میر کا کہنا تھا ودہولڈنگ ٹیکس کے معاملے پر تمام فیصلے 36 رکنی مشاورتی کونسل کرے گی ۔ ان کا کہنا تھا ودہولڈنگ ٹیکس کی واپسی تک حکومت سے مذاکرات نہیں کیے جائیں گے۔ اشرف بھٹی کا کہنا تھا ود ہولڈنگ ٹیکس کے خلاف تاجر برادری متحد ہے ۔ محبوب سرکی کا کہنا تھا ہم نے مشترکہ جدوجہد کے لیے تمام اختلافات بھلا دیے ہیں ۔ میدان میں اتریں گے تو اب اکٹھے اتریں گے ۔
