امیر جماعت اسلامی کراچی حافظ نعیم الرحمن نے حکومت اور شہری انتظامیہ پر زور دیا ہے کہ عید الاضحی کے موقع پر شہر میں قربانی کے جانووروں کی آلائشیں ٹھکانے لگانے اور صفائی ستھرائی کے موثر انتظامات کے لیے پہلے سے اقدامات کرے اور عید کے تینوں دنوں اور اس کے بعد مکمل صفائی اور ستھرائی کویقینی بنائے، شہر بھر میں جراثیم کش اسپرے کیا جائے۔
انہوں نے کہا کہ عید الاضحی کے موقع پر ہر سال کراچی کے شہری اور عوامی حلقے حکومت اور شہری اداروں سے اپیل کرتے ہیں اور اس جانب توجہ دلاتے ہیں اور حکومت کی طرف سے صفائی ستھرائی کے انتظامات کرنے کے دعوے بھی کیے جاتے ہیں لیکن عملاَ جو صورتحال پیدا ہوتی ہے وہ کسی سے ڈھکی چھپی نہیں جگہ جگہ جانوروں کی آلائشیں پڑ ی نظر آتی ہیں گندگی پھیلنے اور صفائی ستھرائی نہ ہونے کی وجہ سے فضا میں تعفن اور بدبو کے باعث شہریوں کو سخت پریشانی اور اذیت کا سامنا کرنا پڑتا ہے اور بیماریاں پھیلنے کا خدشہ بھی رہتا ہے۔
انہوں نے کہاکہ شہر میں صحت مند ماحول کو یقینی بنانا ،آلائشیں ٹھکانے لگانا اور صفائی ستھرائی کے موثر انتظامات کرنا حکومت اور شہری اداروں کی ذمہ داری ہے اور انہیں اپنی ذمہ داریوں کی ادائیگی میں کوئی کسر نہیں چھوڑنی چاہیے ۔ضرورت اس بات کی ہے کہ متعلقہ اداروں کو پہلے سے ہدایت جاری کی جائیں اور اس پورے کام کو مانیٹر کیا جائے تاکہ شہری ہر سال کی طرح اس سال بھی سابقہ صورتحال سے دوچار نہ ہوں ۔
