مہاجر ازم کے نام پر کراچی کے لوگوں کو گمراہ کیا گیا‘لیاقت بلوچ

لاہور (نمائندہ جسارت)جماعت اسلامی پاکستان کے سیکرٹری جنرل اور سابق پارلیمانی لیڈر لیاقت بلوچ نے کہا ہے کہ اپوزیشن جماعتوں کے احتجاج میں جماعت اسلامی شرکت کرتی رہی ہے اور آئندہ بھی احتجاج کا ساتھ دے گی۔ملک میں لاقانونیت ،معاشی دہشت گردی اور عوام دشمن اقدامات بڑھتے جارہے ہیں۔اپوزیشن جماعتوں کو عوامی حقوق کے تحفظ کے لیے مشترکہ لائحہ عمل پر اتفاق کرنا ہوگا۔ عوام کرپشن کا خاتمہ چاہتے ہیں ،قومی وسائل کی منصفانہ تقسیم سے ہی عوامی اعتماد بحال ہوگا،کراچی میں مہاجر ازم اور لسانی عصبیت
کی آڑ میں کراچی کے عوام کوگمراہ کیا گیا۔ لیاقت بلوچ نے این اے126میں کرپشن فری پاکستان مہم کے سلسلے میںمختلف مقامات پر کارنر میٹنگز سے خطا ب کرتے ہوئے کہا ہے کہ اسلامی پاکستان اور مدینہ منورہ کی طرز پرفلاحی اسلامی ریاست بنانے کے لیے عوام کو حق سچ اور امانت و دیانت دار قیادت کا ساتھ دینا ہوگا۔حکمران عوام سے تعلیم ،صحت روزگار حتیٰ کے جینے کا حق چھین رہے ہیں۔جماعت اسلامی عوامی حقوق کی جنگ لڑرہی ہے اور لڑتی رہے گی۔لیاقت بلوچ نے کہا کہ کراچی میں مہاجر ازم اور لسانی عصبیت کی آڑ میں کراچی کے عوام کوگمراہ کیا گیا ۔بھتا خوری،ٹارگٹ کلنگ اور بوری بند لاشوں کا کلچر دیکر کراچی کو بدنامی اور پاکستان کی معاشی شہ رگ کو یرغمال بنا کررکھا ہے۔الطاف حسین اور اس کے حواری ملک دشمنی میں بے نقاب ہوگئے ہیں۔کراچی کے عوام الطاف حسین سے نجات پائیں گے۔اب دھوکے بازی سے کراچی کے لوگوں کو مزید یرغمال نہیں بنایا جاسکتا۔