کفالت یتامیٰ کے تحت7ہزار یتیموں کی کفالت کر رہے ہیں‘ڈاکٹرمشتاق مانگٹ

لاہور(نمائندہ خصوصی)الخدمت فاؤنڈیشن کی جنرل کونسل کا2روزہ ششماہی اجلاس کا مرکزی صدرمحمد عبد الشکور کی زیر صدارت لاہور کے مقامی ہوٹل میں آغاز ہوگیاجس میں الخدمت فاؤنڈیشن کے سینئر
نائب صدر سید احسان اللہ وقاص، سیکرٹری جنرل ڈاکٹر محمد مشتاق مانگٹ، اسسٹنٹ سیکرٹری جنرل میاں بابر حمید ،احمد جمیل راشد، ایگزیکٹو ڈائرکٹر شاہد اقبال،سیکرٹری فنانس منور حسین،ریجنل صدور ، سیکرٹریز اور نیشنل ڈائرکٹرز سمیت بڑے شہروں کے صدور نے خصوصی طور پر شرکت کی۔اجلاس کے پہلے روز ریجنل صدور نے الخدمت فاؤنڈیشن کی گزشتہ 6 ماہ کی کارکردگی کے حوالے سے ملٹی میڈیا پریزنٹیشن دیں اوررپورٹس پیش کیں۔ الخدمت فاؤنڈیشن کے سیکرٹری جنرل ڈاکٹر محمد مشتاق مانگٹ نے رمضان مہم سے متعلق خصوصی رپورٹ پیش کرتے ہوئے بتایا کہ اِس وقت الخدمت کفالت یتامیٰ کے تحت ملک بھر میں 7 ہزار یتیم بچوں کی کفالت کی جا رہی ہے جبکہ مواخات پروگرام کے تحت محنت کشوں کو بلا سود قرضوں کی فراہمی پر بھی خصوصی توجہ دی جا رہی ہے۔محمد عبد الشکور نے اجلاس سے خطاب کرتے ہوئے کہا کہ الخدمت اپنے پراجیکٹس کی مدد سے معاشرے میں مثبت تبدیلی لانے میں کوشاں ہے۔ الخدمت ملک بھر میں مستحق اور نادار افراد کے لیے خدمات سر انجام دے رہی ہے جس کا مقصد پسے ہوئے طبقے کے مسائل کو سمجھتے ہوئے اُن کا سہارا بننا ہے۔