پولیس کی مختلف علاقوں میں کارروائیاں 105 ملزمان گرفتار

کراچی (اسٹاف رپورٹر) پولیس نے شہر کے مختلف مقامات پر چھاپا مار کارروائیوں،مقابلے اور سرچ آپریشن کے بعد 105 ملزمان کو گرفتار کر لیا،ایک ملزم کو زخمی حالت میں گرفتارکیا گیا۔تفصیلات کے مطابق قائد آباد پولیس نے مبینہ مقابلے کے بعدایک ملزم شہزاد کو زخمی حالت میں گرفتارکرلیا۔پولیس کے مطابق اطلاع ملی تھی کہ قائد آباد پل کے قریب موٹر سائیکل سوار ملزمان راہ گیروں سے لوٹ مار کررہے ہیں جس پر پولیس موقع پر پہنچی توملزمان نے پولیس پر فائرنگ کرتے ہو ئے فرار ہونے کی کوشش کی۔ پولیس کی جوابی فائرنگ سے ایک ملزم شہزاد زخمی ہو اجس کوگرفتارکر لیا گیا۔ تاہم ا س کے 2ساتھی فرار ہونے میں کامیاب ہو گئے۔ گرفتار ہونے والے کے قبضے سے ایک مسروقہ موٹرسائیکل اور ایک ٹی ٹی پستول برآمدہوئی، ملزم کے دوسرے ساتھیوں کی گرفتاری کے لیے چھاپے مارے جارہے ہیں ۔نیوٹاؤن پولیس نے ایک اطلاع پر چھاپا مار کارروائی کرتے ہو ئے چوری ،رہزنی اور ڈکیتی کی وارداتوں میں ملزم اقبال کو گرفتار کر کے اس کے قبضے سے اسلحے کے زور پر چھینی گئی موٹرسائیکل نمبرKAC2929 برآمدکرلی۔ ملزم اس سے قبل بھی گرفتار ہو کر جیل جاچکاہے۔ بن قاسم پولیس نے مختلف مقدمات میں ملوث5مفرور ملزمان ایاز ، ریاض، علی نواز، خدابخش اورفداحسین کو گرفتار کرلیا۔گلبہار پولیس نے حاجی مرید گوٹھ میں گھر گھر تلاشی کے بعد10مشتبہ ملزمان کو گرفتار کر لیا۔ جب کہ کراچی پولیس کے ترجمان کی جانب سے جاری ہونے والے ایک اعلامیے کے مطابق کراچی پولیس کے تینوں زونز اور سی آئی اے کی 58مختلف کارروائیوں میں 87ملزمان کو گرفتار کر لیاگیا جن میں قتل کے 3 ،بھتا خوری کے 4،غیرقانونی اسلحہ رکھنے کے 19ملزمان کے علاوہ 8مفرور ملزمان بھی شامل ہیں ۔گرفتارملزمان کے قبضے سے بھاری تعداد میں اسلحہ اور دیگر غیرقانونی اشیا برآمد ہو ئیں ۔