ایشین کیڈٹ اور جونیئر جوڈو چیمپئن شپ کیلیے پاکستان کو کلیئرنس مل گئی

کراچی(اسٹاف رپورٹر) پاکستان جوڈو فیڈریشن (پی جے ایف) کے نائب صدر مسعود احمد نے کہا ہے کہ بھارت نے 10ویں ایشین کیڈٹ اور 17ویں ایشین جونیئر جوڈو چیمپئن شپ کے لیے پاکستانی جوڈوکاز کو شرکت کے لیے کلیئرنس دے دی، امید ہے کہ اب جوڈوکاز کوبروقت ویزے مل جائیں گے۔ ایونٹ 7 ستمبر سے بھارت میں شروع ہو گا۔ انہوں نے کہا کہ ہمیں قومی جوڈوکاز کے ویزوں کی درخواستوں کے مسترد ہونے کا ڈر تھا لیکن بھارتی جوڈو فیڈریشن کے سربراہ مکیش کمار نے ہماری بہت مدد کی جس کے بعد بھارتی وزارت داخلہ نے کلیئرنس دی۔ انہوں نے کہا کہ بھارت کی جانب سے کلیئرنس ملنے کے بعد امید ہے کہ قومی جوڈوکاز کو بروقت ویزے مل جائیں گے۔ انہوں نے کہا کہ قومی جوڈوکاز گزشتہ 2 ماہ سے ایونٹ کی تیاری کر رہے ہیں، اگر ٹیم کو میگا چیمپئن شپ میں شرکت کا موقع ملا تو وہ دوبارہ ایشیا کی ٹاپ 10 ٹیموں میں جگہ بنا لے گی۔ ان کا کہنا ہے کہ آمنہ ہماری پریمیئر جوڈوکا ہیں ہمیں ان سے بہت توقعات وابستہ ہیں، 2020ء اولمپکس گیمز ان کا ہدف ہے اس لیے یہ چیمپئن شپ ان کا اصل امتحان ہو گی۔