پاکستانی فارما کمپنی فرانس میں فارما پلانٹ لگائے گی

کراچی (اسٹاف رپورٹر)معروف دوا ساز کمپنی مارٹن ڈاؤ کے چیئرمین جاوید آکھائی نے اپنے دورہ فرانس کے دوران فرانس کے صدر فرنکوئس ہولانڈ سے ملاقات کی ۔ ملاقات میں دونوں ممالک کے درمیان فارما انڈسڑی کے فروغ کے حوالے سے تعاون پر گفتگو ہوئی۔یہ ملاقات فرانسیسی صوبے کوریز میں ہوئی اس ملاقات کے دوران فرانسیسی صدر کے ہمراہ کوریز کے میئر، گورنر اور ڈپٹی گورنر موجود تھے جبکہ مارٹن ڈاؤ کے وفد میں چیئرمین کے ہمراہ ان کے مشیر ڈیوڈ سید اور دیگر لوگ موجود تھے۔اس موقع پر معروف دوا ساز کمپنی مارٹن ڈاؤ کے چیئرمین جاوید آکھائی نے فرانس کے صدرفرنکوئس ہولانڈ کو بتایا کہ ان کی کمپنی فرانس میں ایک جدید ترین فارما سیوٹیکل پلانٹ لگانے جارہی ہے جس کو حتمی شکل دے دی گئی ہے۔ اس موقع پر فرانسیسی صدرفرنکوئس ہولانڈ نے مارٹن ڈاؤ کی کاوشوں کو سراہتے ہوئے جاوید آکھائی کو کہا کہ فرانس میں نیا فارما پلانٹ ایک خوش آئند عمل ہے اور حکومت اس سلسلے میں بھر پور تعاون کرے گی اور اس پلانٹ کے افتتاح میں بھی شرکت کرے گی۔