پانامالیکس پرپی اے سی نے ایف بی آر، نیب حکام کوآج طلب کرلیا

اسلام آباد (آئی این پی) قومی اسمبلی کی پبلک اکاؤنٹس کمیٹی نے پاناما لیکس کے معاملے پر ایف بی آر اور نیب سمیت دیگر متعلقہ اداروں کوآج جمعرات کو طلب کرلیا‘ کمیٹی نے موقف اختیار کیا ہے کہ 5 ماہ گزرنے کے باوجود پاناما معاملے پر پیش رفت نہیں کی جاسکی‘ عوام کا پیسہ بیرون ملک کیسے لے جایا گیا‘ ادارے ان لوگوں کے خلاف کارروائی کریں جو پیسہ بیرون ملک لے کر گئے۔ ذرائع کے مطابق قومی اسمبلی کی پبلک اکاؤنٹس کمیٹی نے آج جمعرات کو ہونے والے اجلاس میں پاناما کے انکشافات پر ایف بی آر اور نیب سمیت دیگر متعلقہ اداروں کو طلب کیاہے‘ نیب اور ایف بی آر کے اہلکار پاناما معاملات پر اب تک کی ہونے والی پیش رفت سے کمیٹی کو آگاہ کریں گے۔ ذرائع کے مطابق کمیٹی نے پاناما لیکس کے انکشافات کے بعد کارروائی نہ کرنے کے حوالے سے متعلقہ اداروں کی کارکردگی پر عدم اطمینان کا اظہار کیا ہے اور موقف اختیار کیا کہ عوام کا پیسہ ملک سے باہر لے جانے والوں کے خلاف ان اداروں نے کارروائی کیوں نہیں کی حالانکہ متعلقہ اداروں کی ذمہ داری بنتی ہے کہ وہ ایسے افراد کے خلاف کارروائی کریں جو عوام کا پیسہ ملک سے باہر لے جاتے ہیں۔