مانچسٹر(ویب ڈیسک) پاکستان نے واحد ٹی ٹوئنٹی میچ میں انگلینڈ کو 9 وکٹوں سے شکست دے دی۔اولڈ ٹریفورڈ گراونڈ میں کھیلے گئے واحد ٹی ٹوئنٹی میچ میں انگلینڈ نے پاکستان کے خلاف مقررہ 20 اوورز میں 7 وکٹوں کے نقصان پر 135 رنز بنائے جس کے جواب میں گرین شرٹس نے شرجیل خان اور خالد لطیف کی جارحانہ بیٹنگ کی بدولت ہدف 14.5 اوورز میں ایک وکٹ کے نقصان پر باآسانی حاصل کرلیا۔ میچ میں پاکستانی اوپنر خالد لطیف اور شرجیل خان نے زبردست لاٹھی چارج کیا اور اپنی نصف سنچریاں مکمل کیں۔اوپننگ بلے باز شرجیل خان اور خالد لطیف نے اننگز کا آغاز کیا تو دونوں بلے بازوں نے انگلش بولروں کو مار مار کر ان کا بھرکس نکال دیا۔ دونوں اوپنرز نے شاندار کھیل پیش کرتے ہوئے پہلی وکٹ پر 107 رنز کی شراکت قائم کی۔شرجیل خان نے 30 گیندوں پر 3 چھکوں اور 7 چوکوں کی مدد سے اپنی نصف سنچری مکمل کی اور ٹیم کا مجموعی اسکور 107 تک پہنچا تو وہ 59 رنز بنا کر عادل رشید کی گیند پر کیچ آوٹ ہوگئے جب کہ خالد لطیف نے بھی 2 چھکوں اور 8 چوکوں کی مدد سے 42 گیندوں پر 59 رنز بنائے اور ناٹ آوٹ رہے اسی طرح بابراعظم بھی 15 رنز کے ساتھ ناقابل شکست رہے۔ گرین شرٹس نے ہدف 14.5 اوورز میں ایک وکٹ کے نقصان پر باآسانی حاصل کیا اور میچ میں تین وکٹیں حاصل کرنے پر وہاب ریاض کو مین آف دی میچ کے اعزاز سے نوازا گیا۔اس سے قبل انگلش کپتان این مورگن نے ٹاس جیت کر پہلے بیٹنگ کا فیصلہ کیا تو الیکس ہیلز اور جیسن روئے نے ٹیم کو 6 اوورز میں 56 رنز کا جارحانہ آغاز فراہم کیا تاہم 56 کے مجموعی اسکور پر عماد وسیم نے جیسن رائے کو ایل بی ڈبلیو آوٹ کیا جس کے بعد 67 کے مجموعے پر الیکس ہیلز بھی عماد وسیم کا شکار بنے جو 5 چوکوں کی مدد سے سب سے زیادہ 37 رنز بنا سکے۔ جوئے روٹ 6، جوز بٹلر 16، کپتان این مورگن 14، بین اسٹوک 4 اور ڈیوڈ ولے 12 رنز بنا کر آوٹ ہوئے جب کہ معین علی 13 رنز کے ساتھ ناٹ آوٹ رہے۔ پاکستان کی جانب سے وہاب ریاض نے 3 جب کہ عماد وسیم اور حسن علی نے 2،2 وکٹیں حاصل کیں۔واضح رہے کہ قومی ٹی ٹوئنٹی ٹیم کے کپتان سرفرازاحمد کا بحیثیت کپتان یہ پہلا میچ تھا جب کہ ٹیم میں دو کھلاڑیوں بابراعظم اور حسن علی نے ڈیبیو کیا تھا۔پاکستان اور انگلینڈ کے درمیان مانچسٹر میں کھیلے جانے والے ٹی ٹوئنٹی میچ میں انگلینڈ نے پاکستان کو جیت کے لیے 136رنز کا ہدف دیا تھا۔ جسے پاکستان نے 15ویں اوور ایک وکٹ کے نقصان پر پورا کر لیا۔اس سے قبل مانچسٹر کے اولڈ ٹریفورڈ گراﺅنڈ میں کھیلے جانے والے اس میچ کا ٹاس انگلش کپتان نے جیت کر پہلے بیٹنگ کافیصلہ کیا۔ تاہم یہ فیصلہ کچھ زیادہ سودمند ثابت نہ ہوسکا اور ون ڈے سیریز کے برخلاف انگلش ٹیم ٹی ٹوئنٹی میچ میں بڑا اسکور کرنے میں کامیاب نہ ہوسکی۔گذشتہ روز گرین شرٹس نے نہ صرف اچھی بولنگ کی بلکہ فیلڈنگ اور کیچز لینے میں بھی اچھی پرفارمنس دکھائی۔ انگلینڈ کی جانب سے الیکس ہیلز 37 رنز کے ساتھ سرفہرست اسکورر رہے۔
