پاکستان کی 6 جامعات دنیا کی ٹاپ یونیورسٹیوں میں شامل

لندن( صباح نیوز) عالمی درجہ بندی کی بنیاد پر نیشنل یونیورسٹی آف سائنس اینڈ ٹیکنالوجی نسٹ کو ملک کی بہترین یونیورسٹی کا اعزازحاصل ہوا ہے۔پاکستان کی 6 معروف جامعات دنیا کی بہترین یونیورسٹیوں کی نئی رینکنگ میں شامل ہیں اور ان کی تعداد کیو ایس ورلڈ رینکنگ 2015ء کے مقابلے میں دگنی ہے۔کیو ایس ورلڈ یونیورسٹی رینکنگ 2016 ء کے 13ویں ایڈیشن میں امریکا اور برطانیہ کے معروف تعلیمی اداروں نے اپنی ٹاپ پوزیشن برقرار رکھی ہیں۔دنیا کی ٹاپ یونیورسٹی کا اعزاز امریکا کی یونیورسٹی میسا چوسٹس انسٹی ٹیوٹ آف ٹیکنالوجی نے حاصل کیا اور اسٹین فورڈ یونیورسٹی اور ہارورڈ یونیورسٹی بالترتیب دوسرے اور تیسرے نمبر پر ہیں۔کیو ایس نے ایشیا کی ٹاپ300 یونیورسٹیوں کی درجہ بندی کی فہرست میں پاکستان کی 10 یونیورسٹیوں کو شامل کیا ہے۔دریں اثنا دنیا کی بہترین یونیورسٹیوں کی تازہ ترین فہرست میں پاکستان کی 6 یونیورسٹیاں موجود ہیں۔ لاہور یونیورسٹی آف مینجمنٹ سائنسز اور قائد اعظم یونیورسٹی بالترتیب پاکستان کی دوسری اور تیسری بہترین یونیورسٹیاں ہیں۔سالانہ رینکنگ میں اس برس 3 نئی جامعات کو700 بہترین یونیورسٹیوں کے گروپ میں شامل کیا گیا ہے جس میں یونیورسٹی آف کراچی، یونیورسٹی آف انجینئرنگ اینڈ ٹیکنالوجی لاہور اور یونیورسٹی آف لاہور شامل ہیں۔