منصوبہ بندی اور ترقی کے وفاقی وزیر احسن اقبال نے کہا ہے کہ چین پاکستان اقتصادی راہداری کے تحت توانائی اوربنیادی ڈھانچے کے منصوبوں میں سرمایہ کاری کے ذریعے پاکستان کی معیشت میں تبدیلی آئے گی۔
وفاقی وزیر احسن اقبال نے غیر ملکی اخبار کو ایک انٹرویو میں کہا کہ اقتصادی راہداری کے تحت سرمایہ کاری کے منصوبوں کا حجم چھیالیس ارب ڈالر کی ابتدائی رقم سے بڑھ کر تقریبا پچپن ارب ڈالر تک پہنچ گیا ہے۔وفاقی وزیر نے کہا کہ اس سے پاکستان کی حکومت اور کاروباری اداروں کیلئے چین کے آسان شرائط پر قرضوں کی واپسی میں آسانی پیدا ہوگی۔انہوں نے کہا کہ بعض شعبوں میں براہ راست سرمایہ کاری کی جارہی ہے جس سے ہماری پیداواری صلاحیت میں اضافہ ہورہا ہے اوربجلی کے منصوبوں میں بھی واضح بہتری آئے گی۔
