مشیر خارجہ سرتاج عزیز کا کہنا ہے کہ بھارت سندھ طاس معاہدے کی خلاف ورزی کر رہا ہے ، پاکستان اور بھارت کے درمیان مختلف زیر تعمیر پروجیکٹ پر اختلافات موجود ہیں ۔ کہتے ہیں مختلف ممالک کی جیلوں میں 5229 پاکستانی افراد قید ہیں ۔
قومی اسمبلی کا اجلاس اسپیکر قومی اسمبلی سردار ایاز صادق کی زیر صدارت جاری ہے ۔ مشیر خارجہ نے اسپیکر قومی اسمبلی کو اپنا تحریری بیان جمع کرادیا ہے ۔ جمع کرائے گئے بیان کے مطابق سرتاج عزیز کا کہنا ہے کہ بھارت سندھ طاس معاہدے کے تحت اپنی بین الاقوامی ذمے داریاں پوری نہیں کررہا ، جن دریاؤں سے پاکستان کو پانی ملتا ہے بھارت ان دریاؤں پر ڈیم تعمیر کررہا ہے جس پر پاکستان کو تشویش ہے اور اختلاف ہے ۔
سرتاج عزیز کا کہنا ہے کہ کہ پاکستان ایک ذمے دار ایٹمی ملک ہے ، پاکستان نے ہمیشہ عالمی برادری میں ذمے دار ملک کا کردار ادا کیا ہے ۔ پاکستان نے نیوکلیئر سپلائر گروپ میں شمولیت کی درخواست کی تھی ۔
مختلف ممالک کی جیلوں میں قید پاکستان سے متعلق مشیر خارجہ سرتاج عزیز کا کہنا ہے کہ افغانستان کی جیلوں میں ایک سوچھہتر پاکستانی قیدہیں ، افغان حکام انکےحوالے سے کوئی معلومات نہیں دے رہے۔ بیان کے مطاب ق یمن میں 10 ، کویت میں 235 ، لبنان میں ایک ، عراق میں 277 ، سعودی عرب میں 1800 ، قطر میں 47، عمان میں 601 ، اردن میں 6 ، شام میں 3 ، یو اے ای میں 1963 اور بحرین میں 110 پاکستانی مختلف اقسام کے جرائم کی پاداش میں جیلوں میں قید ہیں ۔