جماعت اسلامی سندھ کے امیر ڈاکٹر معراج الہدیٰ صدیقی نے لاہور بم دہماکہ کی شدید مذمت اور اسے انسانیت سے عاری دہشتگردوں اور ملک دشمن عناصر کی کاروائی قراردیتے ہوئے معصوم انسانی جانوں کے ضیاع پر افسوس کا اظہار کیا ہے۔
انہوں نے آج ایک بیان میں مزید کہا کہ پُرامن احتجاجی مظاہرین پر دہشتگرد حملہ اور بڑے پیمانے پر جانی نقصان ملک میں امن امان کی حالت کو سبوتاژ اور پاکستان کے ازلی دشمن کی کاروائی ہے ، دہشتگردی کا جن کمزور ضرور ہوا ہے مگر ابھی مکمل طور پر ختم نہیں ہوسکا ہے، وقفہ وقفہ سے ملک کے مختلف شہروں میں دہشتگردوں کی کاروائیاں اس بات کا ثبوت ہیں کہ دشمن ابھی تک اپنے مذموم اور ناپاک عزائم سے پیچھے نہیں ہٹا ہے۔ حکمران چین کی بانسری بجانے کی بجائے دہشتگردی اور ملک دشمن عناصر کو مکمل طور پر خاتمہ کرنے کیلئے کاروائیوں کو مزید تیز اور عوام کی جان ومال کا تحفظ یقینی بنائیں۔ انہوں نے لاہور بم دھماکہ میں جانبحق افراد کی مغفرت اور لواحقین کیلئے صبر جمیل کی دعا کی ہے۔
