نائب امیر جماعت اسلامی پاکستان ڈاکٹر فرید احمد پراچہ نے کہاہے کہ دہشتگردی اور دہشتگردوں کا خاتمہ وقت کی اہم ضرورت اور حالات کا فوری تقاضا ہے تاہم بغیر ثبوت و شواہد اور بغیر کسی انٹیلی جنس رپورٹ محض پختونوں اور افغانوں کی گرفتاریاں تشویش ناک ہیں ۔
ڈاکٹر فرید احمد پراچہ کی طرف سے جاری ہونے والے بیان میں کہا گیا ہے کہ پٹھان اور افغانی عموماً اسلام اور پاکستان سے محبت کرنے والے ہیں ، پنجاب بالخصوص لاہور میں سالہاسال سے محنت مزدوری کر رہے ہیں ۔ دہشتگردوں کا تعلق نہ تو کسی خاص علاقہ سے ہے نہ کسی خاص زبان بولنے والوں سے ہے ۔ انہوں نے کہاکہ ایسی گرفتاریاں قومی یکجہتی اور صوبائی ہم آہنگی کے بھی منافی ہیں ۔
