بجلی بحران کا خاتمہ اولین ترجیح ہے، وزیراعظم محمد نواز شریف

اسلام آباد(اے پی پی) وزیراعظم محمد نواز شریف نے کہا ہے کہ بجلی بحران کا خاتمہ اولین ترجیح ہے ‘ پاک چین اقتصادری راہداری کے تحت تمام منصوبوں کی بروقت تکمیل کریں گے۔سی پیک کو حقیقت کا روپ دینے پر ہم چین کے شکر گزار ہیں۔انہوں نے یہ بات جمعہ کو پاور کنسٹرکشن کارپوریشن آف چائنہ کے چیئرمین بورڈ آف ڈائریکٹرز اور صدر یان ژی یانگ سے گفتگو کرتے ہوئے کہی جنہوں نے وفد کے ہمراہ ان سے ملاقات کی۔ وزیراعظم نے پاور چائنہ کو
ٹرانسمیشن لائنز اور آبی ذخائر و بجلی کی پیداوار سمیت ہائیڈرو پاور پراجیکٹس میں سرمایہ کاری کے مواقع تلاش کرنے کی دعوت دی۔ اس موقع پر یان ژی یانگ نے وزیراعظم کی جانب سے پرتپاک استقبال پر ان کا خیرمقدم کیا اور کہا کہ چین اور پاکستان کے درمیان تعاون جاری رہے گا۔ انہوں نے کہا کہ پاور پراجیکٹس مضبوط شراکت داری کا ذریعہ بنیں گے۔ انہوں نے وزیراعظم کو بتایا کہ پاکستان کے 100 نوجوان انجینئرز کو چین کے پاور سیکٹر میں تربیت فراہم کی گئی ہے جو پورٹ قاسم پاور پراجیکٹ پر کام کریں گے۔ پاور چائنہ تجربات کے تبادلہ اور استعداد کار بڑھانے کے پروگرام کے تحت مزید پاکستانی پروفیشنلز کو بھی تربیت فراہم کرنے کا ارادہ رکھتی ہے۔