جماعت اسلامی کے وفد کی نائب صدرکلفٹن کنٹونمنٹ بورڈ سے ملاقات

کراچی (اسٹا ف رپورٹر) جماعت اسلامی پبلک ایڈ کمیٹی کے وفد نے کلفٹن کنٹونمنٹ بورڈ کے نائب صدر سے ملاقات کرکے اپنی گزارشات پر مشتمل درخواست ان کے حوالے کی۔تفصیلات کے مطابق کراچی کے علاقے دہلی کالونی،پنجاب کالونی اورملحقہ آبادیوں میں کے الیکٹرک کی جانب سے بلاجواز میٹرزبندش اورداخلی راستوں کی کشادگی کے حوالے سے پبلک ایڈ کمیٹی جماعت اسلامی ضلع جنوبی کے اعلیٰ سطح کے وفد نے کلفٹن کنٹونمنٹ بورڈ کے وائس پریذیڈنٹ عزیز سہروردی سے کلفٹن کنٹونمنٹ بورڈ میں ملاقات کی اور اپنی گزارشات پر مشتمل درخواست جمع کرائی۔وفد میں کلفٹن کنٹونمنٹ بورڈ وارڈ 8کے منتخب کونسلر ذاکر محنتی سمیت دیگرکونسلرز ،پبلک ایڈ کمیٹی کے علاقائی نمائندے خلیفہ انوار ،مونس اخلاص، سہیل رعنااورمسعوداختر سمیت عمائدین علاقہ شمیم بنڈل اور آفتاب احمد بھی شامل تھے۔اس موقع پرگفتگو کرتے ہوئے پبلک ایڈ کمیٹی جنوبی کے سینئر رہنما عبدالناصر سلام نے کہا کہ دہلی کالونی، پنجاب کالونی اورملحقہ علاقوں کی سیکڑوں عمارتوں میں بجلی کے مشترکہ میٹر کے باعث لاکھوں مکین بجلی کے مہنگے یونٹس کی ادائیگی کی وجہ سے اذیت میں مبتلاہیں جو کہ ان غریب کچی آبادی میں رہنے والے مکینوں کیلیے سراسرظلم ہے۔کلفٹن کنٹونمنٹ بورڈ اور عدلیہ جیسے موقراداروں کے نام پرکے الیکٹرک آٹھ سال سے بجلی کے نئے میٹرزکے اجرا پر ٹال مٹول کر رہی ہے۔اس حوالے سے پبلک ایڈکمیٹی کوعلاقہ مکینوں کی جانب سے ہزاروں درخواستیں موصول ہوچکی ہیں۔ملاقات کے دوران کلفٹن کنٹونمنٹ بورڈ کے وائس پریذیڈنٹ عزیزسہروردی نے وفد کومسائل کے قانونی پہلوؤں کے بارے میںآگاہ کیا اور ان مسائل کوحل کرنے کے لیے اپنے بھرپور تعاون کی یقین دہانی کرائی۔