ایرانی بحری جہاز خیرسگالی و تربیتی دورے پر کراچی پہنچ گئے

کراچی (اسٹا ف رپورٹر) ایرانی بحری جہاز نقدی اور تُنب خیر سگالی و تربیتی دور ے پر کراچی پہنچ گئے، بندرگاہ آمد پر پاک بحریہ کے حکام اور ایرانی سفارتی عملے نے ایک پر وقار استقبالیہ تقریب کے دوران جہازوں کا پر تپاک خیر مقدم کیا۔ اس دورے کا مقصد دونوں بحری افواج کے مابین پیشہ ورانہ امور پر تبادلہ خیال اور کھلے سمندر میں مشقوں کے ذریعے باہمی تعاون کو مستحکم کرنا اور مشترکہ آپریشنز کی صلاحیت کو فروغ دینا ہے۔ کراچی میں قیام کے دوران ایرانی بحری جہازوں کے افسران اور جوان اپنے ہم منصبوں سے پیشہ ورانہ ملاقاتوں کے دوران باہمی دلچسپی کے امور پر تبادلہ خیال کریں گے۔ مزید برآں آپریشنل و تربیتی سرگرمیاں اور کھیلوں کے مقابلے بھی اس دورے کا حصہ ہیں۔ دورے کے اختتام پر پاکستانی اور ایرانی بحری افواج کے درمیان آپریشنل ہم آہنگی کے فروغ کے لیے کھلے سمندر میں بحری مشق بھی منعقد کی جائے گی۔ حکومتی پالیسیوں کے مطابق حالیہ دورہ خطے میں امن و سلامتی کے فروغ میں مددگار ثابت ہوگا اور دونوں ممالک کے درمیان بحری تعاون میں اضافے کا باعث ہوگا۔