جامعہ بنوریہ عالمیہ سائٹ ٹاؤن میں حفظ قرآن و حسن صوت کا انعقا د

کراچی (اسٹاف رپورٹر)جامعہ بنوریہ عالمیہ سائٹ ٹاؤن میں ہفتہ کی شب کو حسب سابق مسابقہ حفظ قرآن وحسن صوت کا انعقاد کیاگیا ،جس میں شعبہ تحفیظ القرآن الکریم کے 80سے زائد طلبہ نے شرکت کی ،مسابقہ تحفیظ قرآن مکمل میں 30، حسن صوت میں 45اور 20پارے تحفیظ القرآن میں 15طلبہ نے حصہ لیا ۔ منصفین کے فرائض مشہورو معروف قاری مولانا نذیر مالکی ، مولانا قاری تسلیم اور مولانا ہارون رشید نے انجام دیے جبکہ نظامت کے فرائض مولانا قاری سلطان اور ساجد اللہ انجام دے رہے تھے ۔ مکمل قرآن کے مسابقے میں فصیح الرحمن، حسنین معاویہ اورنور الحق نے اول ،دوم اور سوم پوزیشن حاصل کی، 20پاروں میں حامدالحق نے پہلی ،سید منصور نے دوسری جبکہ عبدالرحمن اور سلیم نے تیسری پوزیشن حاصل کی ، جبکہ 15پاروں میں اول پوزیشن عبدالسلام ، دوم ، نعمان اور عبداللہ سوم پوزیشن حاصل کرنے میں کامیاب ہوئے ۔پوزیشن ہولڈر طلبہ کو نقد انعام دیا گیا جبکہ اول آنے والے طلبہ کے دو اساتذہ قاری انور زیب اور قاری عنایت اللہ کو جامعہ کے خرچے پر عمرے کا اعلان کیاگیا ۔