ریکارڈز بک کے کئی صفحات پر یونس خان کا نام درج

لاہور(جسارت نیوز) ریکارڈز بک کے کئی صفحات پر یونس خان کا نام درج ہے جبکہ ٹوئنٹی 20 کے ورلڈ چیمپئن کپتان ٹیسٹ میں ملک کے ٹاپ اسکورر بنے۔یونس خان نے انٹرنیشنل کیریئر کا آغاز 13 فروری 2000 کو کراچی میں سری لنکا کیخلاف ون ڈے میچ میں کیا اور 46 رنز بنائے، پہلا ٹیسٹ 26 فروری کو آئی لینڈرز کیخلاف راولپنڈی میں کھیلا اور سنچری بنا کر روشن مستقبل کی نوید سنائی،انھوں نے طویل فارمیٹ کے 115میچز میں 53.06 کی اوسط سے 9977 رنز اسکور کیے، یوں 10 ہزار رنز کا سنگ میل عبور کرنے کیلئے انھیں صرف 23 رنز درکار ہیں، انھوں نے اپنا سب سے بڑا اسکور 313 رنز2009 میں سری لنکا کیخلاف بنایا۔اپنے کیریئر میں یونس خان نے پاکستان کی جانب سے ٹیسٹ کرکٹ میں سب سے زیادہ رنزبنانے والے جاوید میانداد کو پیچھے چھوڑا، انضمام الحق کا سب سے زیادہ 25 سنچریوں کا ریکارڈ بھی توڑا، انھوں نے 34تھری فیگر اننگز کھیلی ہیں۔ یونس خان نے نومبر 2015 میں آسٹریلیا کے خلاف یواے ای میں سیریز کے دوران اچانک ون ڈے کرکٹ سیا ریٹائرمنٹ کا اعلان کرنے تک 265 میچز میں 7سنچریوں اور 48 ففٹیز کی مدد سے 7249رنز بنائے تھے۔یونس خان نے اپنی قیادت میں پاکستان کو 2009 میں ٹی ٹوئنٹی کا ورلڈ چیمپئن بنایا جو 1992 کی ورلڈکپ فتح کے بعد اب تک گرین شرٹس کا دوسرا عالمی اعزاز ہے، میگا ایونٹ کے بعد ہی انھوں نے مختصر فارمیٹ کی کرکٹ سے کنارہ کشی کا اعلان کردیا تھا، انھیں حال ہی میں وزڈن نے سال کے5بہترین کھلاڑیوں میں بھی شامل کیا ہے۔