یونس خان کو سینئراور جونیئرکرکٹرز کا خراج تحسین

اسلام آباد(جسارت نیوز)یونس خان کی ریٹائرمنٹ پر سینئر اور جونیر کرکٹرز کا زبردست خراج تحسین پیش کرنے کا سلسلہ جاری ہے ، کسی نے بے داغ کیر یئر پر مبارکباد دی تو کوئی شخصیت کے گن گاتا نظرآیا، شعیب اختر نے یونس خان کی پاکستان کرکٹ کے لیے ایمانداری اور بے لوث خدمات کے عوض ان کو ‘یونیک خان’ کا نام تجویز کردیا۔تفصیلات کے مطابق ایک طویل عرصے بعد کسی قومی کر کٹر کو شان کے ساتھ رخصت ہوتے دیکھا والدہ کے ہاتھ تسبیح کے دانوں پر تھے تو کرکٹرز کی زبان پر یونس کی تعریف۔ جونیئرز کا کہنا تھا کہ کیریئر کے ہر موڑ پر یونس خان کی مدد ہمیں حاصل رہی۔ یونس خان کی زندگی کے اس اہم فیصلے کے موقع پر ان سے محبت کرنے والوں کی ایک بڑی تعداد اس بات کا ثبوت تھی کہ یونس خان لوگوں کے دلوں میں گھر کرنا جانتے ہیں۔ جبکہ سابق فاسٹ بولر شعیب اختر نے کہا کہ یونس خان کی پاکستان کرکٹ کے لیے ایمانداری اور بے لوث خدمات کے عوض ان کو ‘یونیک خان’ کا نام دیا جانا چاہیے۔شاہد آفریدی نے اپنے پیغام میں کہا کہ یونس خان عظیم ترین کھلاڑیوں میں سے ایک ہیں۔ ایسے فخر کے ساتھ ملک کی نمائندگی کرنے پر یونس خان کا شکریہ۔