***۔۔۔۔۔۔گوادر۔۔۔۔۔۔***

گوادر (نمائندہ جسارت) کسی بھی ریاست کا فرض منصبی ہے کہ اپنے عوام کو زندگی کی بنیادی ضروریات آسانی کے ساتھ مہیا کرے۔ انسانی زندگی کے لیے آکسیجن کے بعد سب سے اہم ترین ضرورت پانی ہے۔ پانی کے بغیر زندگی نا مکمل ہے۔ اسی طرح موجودہ زمانے میں بجلی بھی بنیادی ضروریات میں شامل ہے ۔ پانی اور بجلی دو ایسی ضرورتیں ہیں کہ موجودہ زمانے کا انسان ان کے بغیر جینے کا تصور بھی نہیں کر سکتا ہے ۔ بی این پی تحصیل ترجمان کے مطابق پارٹی کے صدر ماجد سہرابی اور جنرل سکریٹری جبار بلوچ نے اپنے جاری کردہ بیان میں کہا ہے کہ گوادر کی ترقی سر آنکھوں پر ہم گوادر کی ترقی کو خوش آمدید کہتے ہیں۔ ترقی ایک ایسا لفظ ہے جس کے ساتھ سہولتیں اور آسانیاں وابستہ ہیں۔ بنیادی انسانی حقوق وابستہ ہیں اور ایک بہترین زندگی وابستہ ہے۔ ماجد سہرابی اور جبار بلوچ نے مزید کہا کہ ہم صرف یہ چاہتے ہیں کہ ترقی کے نام پر ہمارے ساتھ دھوکا نہ کیا جائے، گوادر کے عوام کے انسانی حقوق کو پامال نہ کیا جائے۔ سی پیک ایک عظیم منصوبہ ہے۔ یقیناً اس سے روزگار کے دروازے کھلے گے۔ اس سے آبادی میں بھی تیز رفتاری کے ساتھ اضافہ ہوگا۔ گوادر کی موجودہ آبادی بے انتہا مشکلات و مصائب کا شکار ہے۔ پانی اور بجلی دونوں ناپید ہیں۔ گرمی کا موسم تو گوادر کے عوام کے لیے درد سر کی صورت بن کر آتا ہے۔ کیونکہ گرمی کا موسم شروع ہوتے ہی کیسکو کی طرف سے اعلانیہ اور غیر اعلانیہ لوڈ شیڈنگ کا سلسلہ شروع کیا جاتا ہے۔ دن اور رات کئی کئی گھنٹے بجلی غائب رہتی ہے اور یہ سلسلہ کئی سال سے جاری ہے۔ اس کے ساتھ پانی کا بحران بھی ہر وقت گوادر کے عوام کے سر پر منڈلاتا ہے ۔ جب بارشیں ہو تو کچھ وقت کے لیے بحران ٹل جاتا ہے۔ ڈیم میں پانی موجود ہونے کے باوجود دس سے پندرہ دن تک پانی کی سپلائی نہیں ہوتی اور اگر سپلائی ہوتی بھی ہے تو صرف ایک گھنٹے کے لیے جو گوادر کے عوام کے ساتھ ظلم ہے۔ یہ تو لفظ ترقی کے ساتھ زیادتی کے مترادف ہے۔ ہم کیسکو اور محکمہ آب رسانی سے پر زور مطالبہ کرتے ہیں کہ گرمی کے ان دنوں میں گوادر کے عوام کو پانی اور بجلی تسلسل کے ساتھ مہیا کریں بصورت دیگر عوام کے صبر کا پیمانہ لبریز ہو سکتا ہے۔* کسی بھی سوسائٹی میں ایک استاد کا کردار انتہائی عزت اور اہمیت کا حامل ہوتا ہے ۔ کیونکہ استاد اس سوسائٹی کی نئی نسل کو تعلیم کی روشنی سے ہمکنار کرتا ہے ۔ وہ نئی نسل کو مستقبل کے لیے تیار کرتا ہے ۔ ایک روشن اور کامیاب زندگی کے حصول میں استاد بچوں کی رہنمائی کرتا ہے ۔ وہ بچوں کو زندگی کے چیلنجز کے لیے تیار کرتا ہے۔ ان کو ایک بہتر اور کامیاب زندگی میں داخل کرنے کے لیے اپنی صلاحیتیں وقف کرتا ہے ۔ گورنمنٹ ٹیچرز ایسوسی ایشن کے ترجمان کے مطابق گزشتہ روز طلبہ کے ساتھ ایک نشست میں جی ٹی اے کے صدر نادل علی بلوچ، نائب صدر مجید کے بی، جنرل سیکرٹری حنیف داد، ڈپٹی آرگنائزر اکبر رمضان، آفس سیکرٹری جمیل احمد اور دیگر نے طلبہ کے مسائل اور ان کو درپیش چیلنجز کے بارے میں بات چیت کی۔ ان کو بتایا گیا کہ زندگی میں وہی لوگ کامیابی کے منازل تک پہنچتے ہیں جو محنت اور لگن اور عزم کے ساتھ اپنی تعلیم پر توجہ دے۔ آپ بھی تمام تر مشکلات کے باوجود عزم و ارادے کے ساتھ بھر پور تعلیم حاصل کریں۔* گوادر میں بجلی کا 13 گھنٹہ مسلسل بریک ڈاؤن، شہری و کاروباری حضرات بلبلا اٹھے۔ ہفتے کی صبح سات بجے سے شام آٹھ بجے تک بجلی کی 13 گھنٹہ طویل دورانیہ کی بندش نے شہریوں اور کاروباری حضرات کو شدید دشواری میں ڈال دیا۔ کسیکو ذرائع کے مطابق پسنی گرڈ اسٹیشن میں بریکر کی تبدیلی و گوادر پورٹ گرڈ اسٹیشن کی لائن تھرو کرنے کے لیے بجلی کی فراہمی روک دی گئی تھی۔