قومی کرکٹ ٹیم کے سابق کپتان اور آل راؤنڈر شاہد آفریدی قومی ٹیم سے تو باہر ہیں

کراچی(اسٹاف رپورٹر )قومی کرکٹ ٹیم کے سابق کپتان اور آل راؤنڈر شاہد آفریدی قومی ٹیم سے تو باہر ہیں لیکن انٹرنیشنل کرکٹ کونسل نے کرکٹ میں ان کی خدمات کا اعتراف کرتے ہوئے انہیں چیمپئنز ٹرافی کا سفیر مقرر کردیا ۔آئی سی سی ( انٹرنیشنل کرکٹ کونسل )نے انگلینڈ میں ہونے والی چیمپیئنز ٹرافی کے لیے قومی کرکٹ ٹیم کے سابق کپتان شاہد آفریدی سمیت 8 سفیروں کے ناموں کا اعلان کردیا جنھوں نے مجموعی طورپر 1774 ایک روزہ میچوں میں 48 سنچریوں کی مدد سے 51 ہزار 906 رنز بنائے اور838 وکٹیں حاصل کیں۔آئی سی سی کی جانب سے جاری کیے گئے اعلامیہ کے مطابق مستقبل کی نسل کو کھیل سے متاثر کرنے اور ٹورنامنٹ کی مقبولیت کو بڑھانے کے لیے یکم جون سے 18 جون تک کھیلی جانے والی چیمپیئنز ٹرافی کے لیے 8 سفیروں کا اعلان کردیا گیا۔آئی سی سی نے پاکستان کرکٹ ٹیم کے سابق کپتان شاہد آفریدی کو بھی کرکٹ کے مشہور کھلاڑیوں کے ساتھ سفیروں کی فہرست میں شامل کیا ہے ،چیمپیئنز ٹرافی کے سفیروں میں پاکستان کے شاہد آفریدی، بنگلا دیش کے حبیب البشر، انگلینڈ کے آئن بیل، نیوزی لینڈ کے شین بونڈ، آسٹریلیا کے مائیک ہسی، بھارتکے ہربھجن سنگھ، سری لنکا کے کمارسنگا کارا اور جنوبی افریقا کے سابق کپتان گریم اسمتھ شامل ہیں۔ شاہد آفریدی کا کہنا ہے کہ مجھے آئی سی سی چیمپیئنز ٹرافی کا سفیر مقرر کیا گیا، جن کھلاڑیوں کے خلاف بین الاقوامی کرکٹ کھیلی تھی ان کھلاڑیوں کے بہترین گروپ میں شامل ہونا خوش قسمتی ہے۔ پاکستان کے سابق کپتان نے چیمپیئنز ٹرافی میں 13 میچ کھیلے ،14 وکٹیں حاصل کیں اور 167 رنز بھی بنائے۔ان کا کہنا تھا کہ چیمپیئنز ٹرافی ایک ایسا ٹورنامنٹ ہے جس کو پاکستان نے کبھی نہیں جیتا اور اب بھارت، جنوبی افریقا اور سری لنکا کے ساتھ ایک مشکل گروپ میں ہے۔ مایہ ناز آل راؤنڈر نے کہا کہ پاکستانی ٹیم کو اپنی صلاحیت پر بھروسہ کرنا چاہیے اور ہر میچ میں لطف اندوز ہونے کی کوشش کرنی چاہیے کیونکہ کامیابی کے لیے کوئی شارٹ کٹ نہیں ہوتا اور ان کھلاڑیوں کو بھی اپنے سابق کھلاڑیوں یا دیگر بہترین ٹیموں کی طرح ہی کام کرنا ہوگا’،آئی سی سی کے چیف ایگزیکٹو ڈیوڈ رچرڈسن نے کہا کہ چیمپیئنز ٹرافی کے آغاز میں 50 دن باقی ہیں اور ہم ان 8 بہترین کرکٹرز کو اپنے چمپیئن ایمبسیڈرز کے طور پر اعلان کرتے ہوئے خوش ہیں۔ان کا کہنا تھا کہ یہ پروگرام ان عظیم کھلاڑیوں کو نئے کرکٹ کے مداحوں کی نئی نسل اور کھلاڑیوں کو یکجا کرے گا، کھلاڑی ہماری کرکٹ کے ذریعے اچھے پراجیکٹ اور کھیل کا سدا بہار ورثہ چھوڑیں گے۔ آئی سی سی کے چیف ایگزیکٹو نے کہا کہ یہ کھلاڑی آئی سی سی کی ویب سائٹ کے ذریعے مداحوں کو اپنے مہارت اور اچھے مشوروں سے نوازیں گے اور مجھے یقین ہے کہ چمپیئنز ٹرافی کے 15 میچوں میں ہم سب ان کے تجزیوں کو پڑھ کر محظوظ ہوں گے،چمپیئنز ٹرافی کا پہلا میچ میزبان انگلینڈ اور بنگلا دیش کے درمیان اوول میں کھیلا جائے گا جبکہ تمام میچز انگلینڈ اور ویلز کے3 مقامات اوول، ایجبسٹن اور کارڈف میں کھیلے جائیں گے۔