آئندہ میچوں میں بھی اپنی ٹیم کی فتح میں اہم کردار ادا کرونگا،معین علی

لندن (جسارت نیوز) انگلینڈ کرکٹ ٹیم کے مایہ ناز آل رائونڈر معین علی نے کہا ہے کہ وہ پروٹیز کے خلاف ٹیسٹ سیریز کے بقیہ میچوں میں بھی عمدہ آل رائونڈ کارکردگی کی بدولت اپنی ٹیم کی فتوحات میں اہم کردار ادا کرینگے۔ انہوں نے کہا کہ وہ اپنی کارکردگی سے مطمئن اور بھرپور فارم میں ہیں اور پروٹیز کے خلاف اپنی عمدہ کارکردگی کی بدولت ٹیسٹ سیریز کے آئندہ میچوں میں بھی ٹیم کی فتح میں اہم کردار ادا کرینگے، انہوں نے کہا کہ انکی ٹیم مکمل طور پر فٹ اور بھر پور فارم میں ہے اور جنوبی افریقا کو ٹیسٹ سیریز میں کلین سوئپ کرنے کے لئے پرعزم ہے ۔ انگلینڈ نے پروٹیز ٹیم کو پہلے ٹیسٹ میچ میں 211 سے شکست دیکر 4 میچوں کی سیریز میں 1-0 کی برتری حاصل کر رکھی ہے۔ دونوں ٹیموں کے درمیان4 ٹیسٹ میچوں کی سیریز کا دوسرا میچ 14 جولائی سے ٹرینٹ برج، نوتنگھم میں شروع ہوگا۔ معین علی نے بیان میں کہا کہ جنوبی افریقا کو پہلے ٹیسٹ میچ میں شکست دیکر ٹیم کے اعتماد میں اضافہ ہوا ہے امید ہے کھلاڑی جنوبی افریقا کے خلاف ٹیسٹ سیریز کے بقیہ میچوں میں بھی عمدہ کارکردگی کا مظاہرہ کرتے ہوئے مزید کامیابیاں حاصل کرینگے ۔ انہوں نے کہا کہ بلا شبہ جنوبی افریقا کی ٹیم متوازن ٹیم ہے اور وہ سیریز جیتنے کیلئے ہر حربہ استعمال کرے گی اسلئے کھلاڑیوں کو پہلے میچ میں جیت کے باوجود جنوبی افریقا کو آسان حریف نہیں سمجھنا چاہیے ۔ انہوں نے کہا کہ جنوبی افریقاکی ٹیم کے خلاف ٹیسٹ سیریز اپنے نام کرنے کیلئے سرتوڑ کوشش کریں گے۔