افغان فورسز کا ضلع نوا بارکزئی سے طالبان کا قبضہ چھڑانے کا دعویٰ

کابل(مانیٹرنگ ڈیسک) افغان سیکیورٹی فورسز نے دعویٰ کیا ہے کہ انہوں نے 2 دن تک جاری رہنے والی شدید لڑائی کے بعد صوبہ ہلمند کے اہم ترین ضلع نوا بارکزئی سے طالبان کا قبضہ چھڑا لیا ہے۔غیر ملکی خبررساں ایجنسی کے مطابق افغان حکام کا کہنا ہے کہ طالبان کے مضبوط ترین گڑھ سمجھے جانے والے صوبے ہلمند میں افغان فورسز کی پیش قدمی کا سلسلہ جاری ہے۔ افغان فورسز نے دو روز تک جاری رہنے والے شدید لڑائی کے بعد صوبہ ہلمند کے دارالحکومت لشکر گاہ کے جنوب میں واقع اہم ضلعے نوابارکزئی سے طالبان کا قبضہ چھڑا لیا اور اس دوران طالبان کے 50 سے زائد جنگجوؤں کو بھی ہلاک کیا گیا۔افغان وزارت دفاع کے ترجمان دولت وزیری نے اس بات کی تصدیق کی اور کہا کہ افغان فوسرز نے ضلعے کا کنٹرول سنبھال لیا ہے اور اس دوران طالبان کے زیر استعمال گاڑیاں اور آلات بھی تباہ کیے گئے۔ حکام کا کہنا ہے کہ سیکورٹی فورسز کا آپریشن جاری رہے گا اور اب وہ گرمسیر قصبے کی جانب پیش قدمی کریں گی۔خیال رہے کہ اسآپریشن میں افغان فورسز کو امریکی فوجی مشیروں، امریکی ایف 16طیاروں اور اپاچی ہیلی کاپٹرز کی فضائی معاونت بھی حاصل ہے اور وہ طالبان کو ہلمند کے دارالحکومت لشکر گاہ پر قبضہ کرنے سے روکنے کی کوشش کر رہے ہیں۔ طالبان افغانستان میں اپنی حکومت قائم کرنے کے خواہاں ہیں اور غیر ملکی افواج کی حمایت یافتہ حکومت سے چھٹکارا حاصل کرنے کی کوشش کررہے ہیں۔ طالبان کمانڈرز یہ کہہ چکے ہیں کہ افغانستان سے آخری غیر ملکی فوجی کے نکل جانے تک جنگ جاری رہے گی۔