میرپور خاص، گوٹھ مرید خاں وسان پر پولیس اور مسلح افراد کی چڑھائی

میرپور خاص (نمائندہ جسارت) پیرومل تھانے کی حدود میں واقع گوٹھ مرید خاں وسان پر نوشہرو فیروز پولیس اور دیگر مسلح افراد کی چڑھائی، مقامی لوگوں کی مداخلت پر فائرنگ کا تبادلہ جس کے نتیجے میں چانڈیو برادری کی خاتون سمیت تین افراد جاں بحق جبکہ ایک سپاہی سمیت چار افراد زخمی ہوگئے۔ کنڈیاری پیرومل تھانے کی حدود میں گزشتہ روز نوشہرو فیروز پولیس کے ہمراہ دیگر مسلح افراد نے گوٹھ مرید خاں وسان پر چڑھائی کردی اور لوگوں کو پکڑنے کی کوشش کی جس پر علاقے کے لوگوں نے مزاحمت کی تو پولیس اور لوگوں میں فائرنگ کا تبادلہ ہوا جس کے نتیجے میں چانڈیو برادری کی خاتون عزیزاں چانڈیو، خادم حسین چانڈیو جبکہ نوشہرو فیروز کے رہائشی اکبر چانڈیو گولیاں لگنے سے موقع پر ہلاک ہوگئے جبکہ عرس چانڈیو، پولیس اہلکار زہیر اور دیگر دو افراد زخمی ہوگئے، جنہیں مقامی اسپتال منتقل کیا گیا ہے۔ دوسری جانب اطلاع ملنے پر ایس ایس پی سانگھڑ موقع واردات پر پہنچے، جہاں انہوں نے بتایاکہ حملہ آور نوشہرو فیروز سے آئے تھے، جن کے ساتھ وہاں کی مقامی پولیس بھی ساتھ تھی، سانگھڑ پولیس کو اس حوالے سے نہ کوئی اطلاع دی گئی تھی اور نہ ہی کسی تھانے پر ان کی انٹری تھی، نوشہرو پولیس کے مطابق خادم حسین کے خلاف نوشہرو فیروز میں کیس درج ہے، جس پر یہ کارروائی کی گئی جبکہ مقامی لوگوں نے بتایا کہ ہمارا رشتہ کا تنازعہ چل رہا ہے اور نوشہروفیروز پولیس نے ملزمان کی کمداری کرتے ہوئے مسلح افراد کے ساتھ مل کر ہم پر حملہ اور فائرنگ کر کے ہمارے بے گناہ لوگوں کو قتل کیا ہے۔