ختم نبوت قانون کو چھیڑنے والا اپنی موت کو دعوت دے گا ،فضل الررحمن

سوات (خبر ایجنسیاں) جمعیت علمائے اسلام (س) کے سربراہ مولانا فضل الرحمان نے کہا ہے کہ ختم نبوت قانون کو چھیڑنے والا اپنی موت کو دعوت دے گا،سی پیک کیخلاف امریکا اور بھارت یک زبان ہوگئے ، پاکستان کے روشن مستقبل پر کلہاڑا مارنے کی کوشش کی جارہی ہے، ہمیں افغانستان سے لڑایا جارہا ہے، بزدل دشمن چور دروازے سے حملہ کرتا ہے، کبھی ملک کی وفاداری کا سودا نہیں کیا، پاناما
پاکستان کیخلاف عالمی سازش ہے۔ ان خیالات کا اظہار انہوں نے سوات میں جلسے سے خطاب کرتے ہوئے کیا۔ امیر جے یو آئی ف نے کہا کہ دشمن بزدل ہے، چور دروازے سے حملہ کرتا ہے، چور دروازے سے ختم نبوت کے قلعے میں نقب لگانے کی کوشش کی گئی، کوئی مائی کا لعل ختم نبوت کے قانون کو نہیں چھیڑ سکتا، اگر کوئی چھیڑے گا تو اپنی موت کو دعوت دے گا۔فضل الرحمان نے مزید کہا کہ علمائے کرام نے جمہوری پاکستان کی حمایت کی، دہشت گردی کے خلاف جے یو آئی ف نے نظریاتی جنگ لڑی، علمائے کرام کا بھی شکریہ ادا کیا جائے اور جے یو آئی ف کا بھی شکریہ ادا کیا جائے۔ فضل الرحمان نے مزید کہا کہ پاکستان چین کے ساتھ نیا اقتصادی دور شروع کرنا چاہتا ہے، ملک میں نئے بحران پیدا کیے جا رہے ہیں، پاکستان کے روشن مستقبل پر کلہاڑا مارنے کی کوشش کی جارہی ہے ،ہمیں افغانستان سے لڑایا جارہا ہے۔سی پیک پر امریکا نے متنازع بیان دیا، امریکا اور بھارت کی بولی ایک ہو گئی ہے، پاناما کو پاکستان کے خلاف عالمی سازش سمجھتا ہوں، ہماری بات کو سمجھا نہیں گیا، ہمارے جذبے کا احترام نہیں کیا گیا، امریکا نے پاکستان کو امداد بند کرنے کی دھمکی دی۔فضل الرحمان کا یہ بھی کہنا تھا کہ فاٹا کا مسئلہ اتنا سنگین نہیں جتنا بنایا جا رہا ہے، کچھ لوگ فاٹا کے چاچے، مامے بنے ہوئے ہیں، فاٹا کے عوام پسماندہ ہیں، ان کی پسماندگی کو دور کرنے کا راستہ کس نے روکا ہے؟ پتا ہے امریکا نے کہاں کہاں دباؤ ڈالا، فاٹا کے عوام کو اختیار دو تاکہ وہ اپنے مستقبل کا فیصلہ خود کریں، کچھ لوگ ہم پر دباؤ ڈال کر مسئلے کو متنازع بنا رہے ہیں۔