ایشیا کپ ہاکی پاکستان اور جاپان کا میچ 2-2 گول سے برابر

ڈھاکا (نمائندہ خصوصی)10واں ایشیا کپ ہاکی ٹورنامنٹ میں پاکستان اور جاپان کے درمیان میچ 2-2 گول سے برابر رہا، گرین شرٹس کی جانب سے محمد ارسلان قادر اور محمد عمر بھٹہ نے ایک، ایک گول کیا۔ بنگلا دیش میں ایونٹ میں گزشتہ روز کھیلے گئے گروپ اے کے پہلے میچ میں پاکستان اور جاپان کے درمیان میچ دلچسپ مقابلے کے بعد 2-2 گول سے برابری پر ختم ہوا، دونوں ٹیموں نے فیصلہ کن گول کرنے کیلئے آخر دم تک ایک دوسرے کے گول پوسٹ پر تابڑ توڑ حملے کئے تاہم کوئی بھی ٹیم کامیاب نہ ہو سکی، جاپان کو پہلے ہاف میں گرین شرٹس کے خلاف 2-1 گول کی برتری حاصل تھی تاہم پاکستان نے دوسرے ہاف میں گول کر کے مقابلہ برابر کر دیا، میچ کے 16ویں منٹ میں پاکستان کے ارسلان قادر نے گول کر کے ٹیم کو جاپان کے خلاف 1-0 گول کی برتری دلائی لیکن اس کے بعد جاپان نے 22 ویں اور 29ویں منٹ میں گول کر کے مقابلہ 2-1 گول کر دیا جو پہلے ہاف تک برقرار رہا، دوسرے ہاف کے 50 ویں منٹ میں پاکستان کے عمر بھٹہ نے گول کر کے مقابلہ 2-2 سے برابر کر دیا اور جاپان کی جیت کی امیدیں دھری کی دھری رہ گئیں۔ پاکستانی ٹیم ایونٹ میں اپنا تیسرا اور آخری میچ کل روایتی حریف بھارت کے خلاف کھیلے گی۔دوسری طرف بھارت اور بنگلادیش کے درمیان کھیلے گئے میچ میں بھارت نے میزبان ٹیم بنگلادیش کو 7-0سے شکست دے دی۔ یہ بنگلادیش کی دوسری شکست ہے اس سے قبل پاکستان نے بنگلادیش کو 7-0سے شکست دی ہے