کراچی(اسٹا ف رپورٹر) شمسی توانائی سے چلنے والا پانی صاف کرنے کا پلانٹ نصب، ٹول پلازہ کراچی میں ایک سماجی تنظیم ’ہیومن نیساسٹی فاؤنڈیشن‘ نے شمسی توانائی سے چلنے والا پانی صاف کرنے کا پلانٹ نصب کیا ہے اور کم از کم 15سو گھرانوں کو اس سے صاف پانی میسر آسکے گا۔
ہیومن نیساسٹی فاؤنڈیشن‘کے چیئرمین ظاہر علی شاہ نے میڈیا سے بات چیت کر تے ہو ئے کہا کہ تنظیم کی جانب سے صوبہ سندھ خاص کر تھر پارکر میں اب تک 75سے زائد اس طرح کے منصوبوں کا آغاز ہو چکا ہے
جبکہ مزید 40منصوبے تکمیل کے آخری مراحل میں ہیں۔اس کے علاوہ صوبہ پنجاب، بلوچستان اور خیبر پختونخواہ میں بھی 25سے زائد منصوبے جاری ہیں۔انہوں نے مزید کہا کہ’ ہیومن نیسا سٹی فاؤنڈیشن‘کے قیام کا مقصد غریب اور غیر مستفیض علاقوں میں لوگوں کو پینے کے صاف کی فراہمی ہے۔
یہ وہ علاقے ہیں جنہیں عموماً’ دور دراز‘ کا کہہ کر چھوڑ دیا جاتا ہے۔ شمسی توانائی سے چلنے والے پلانٹ سے اب یہ علاقے بھی پینے کے صاف پانی سے فیضیاب ہوسکیں گے۔
ٹول پلازہ پلانٹ کی افتتاحی تقریب کی مہمان خصوصی فوزیہ قصوری تھیں جنہوں نے اپنے خیالات کا اظہار کرتے ہوئے کہا کہ غریب عوام کی پینے کے صاف پانی تک رسائی بہت مشکل ہے۔ غربت زدہ علاقوں میں آلودہ پانی سے کئی بچے جان کی بازی ہار چکے ہیں۔ ہزاروں بچے پیٹ کی متعدد موذی بیماریوں میں مبتلا ہیں۔
پلانٹ کوجنید جمشید کے نام سے منسوب کیا گیا ہے۔
