درعا میں اسدی فوج کی بمباری،60 سےزائد افراد جاں بحق

درعا: شام کا جنوبی شہر درعا میں بشارالاسد اور ایرانی گماشتوں کی بمباری سے ایک ہی دن میں 60 افراد کو جاں بحق کردیا گیا جن میں 15 معصوم بچے بھی شامل ہیں ۔

درعا شہر میں اسد رجیم کی سرکاری فوج، ایرانی ملیشیا اور روسی فوج سب مسلسل حملے کر رہے ہیں۔ شامی اپوزیشن اور روس کے درمیان مذاکرات کی کوشش کے باوجود درعا میں قتل عام کا سلسلہ روکا نہیں جا سکا ہے۔

شام کے ایک مقامی فوٹو گرافر انس الشامی نے اپنے کیمرے کی آنکھ میں درعا میں ڈھائی جانے والی قیامت کے بعض لرزہ خیز مناظر مخفوظ کئے ہیں۔ ان میں بیشتر مناظر ان بچوں کے ہیں جو اسدی فوج کی درندگی کی بھینٹ چڑھ کر عالمی امن کے ٹھیکے داروں کا منہ چڑا رہے ہیں۔

انس الشامی کے کیمرے میں محفوظ ہونے والے بعض مناظر کو انہوں نے سوشل میڈیا پر شیئر کیا ہے۔ جس میں مقامی فوٹو گرافر نے شامی حکومت کو آڑے ہاتھوں لیتے ہوئے کہا کہ اس طرح کوئی جانوروں کا قتل بھی نہیں کرتا جس طرح بشار اور اس حواری شامی بچوں کے ساتھ کررہے ہیں۔

مقامی فوٹوگرافر کی تصاویر میں دیکھا جاسکتا ہے کہ بمباری میں بچوں کے جسمانی اعضاء کے ان کے تَن سے جدا ہوگئے ہیں۔ کسی کا بازو نہیں تو کسی کی ٹانگیں کٹ چکی ہیں ،کسی کا دھڑ غائب ہے۔بے رحمی سے کی گئی بمباری کے نتیجے میں بچوں کی شناخت تک مشکل ہو چکی ہے۔

انس الشامی نے ’فیس بک‘ پر ایک شہید بچی کی تصویر پوسٹ کی ہے جس کی آدھی آنکھیں کھلی دکھائی دیتی ہیں۔ الشامی کا کہنا ہے کہ اس بچی کی شناخت نہیں ہو سکی کہ یہ کس کا لخت جگر ہے۔ اس کا پورا جسم خون میں لت پت ہے۔ اسے کسی آتشیں گولے سے نشانہ بنایا گیا۔