نادرن ریجن کے ممبران کو درپیش مسائل ترجیحی بنیادوں پر حل کریں گے،شاہد وسیم،چیئرمین پی سی ڈی ایم اے
پاکستان کیمیکلز اینڈ ڈائز مرچنٹس ایسوسی ایشن( پی سی ڈی ایم اے) کی ایگزیکٹو کمیٹی نے اتفاق رائے سے کاشف رضا کو لاہورزونل آفس کا صدر مقررکیا ہے ۔ پی سی ڈی ایم اے کے چیئرمین شاہد وسیم نے لاہور آفس کو دورہ کیا جہاں انہوں نے ایگزیکٹیو کمیٹی کے اجلاس کے بعد نئے صدر کی تقرری کا اعلان کیا۔اس موقع پرسابق صدر عامر منیر،محمداقبال،سبکدوش صدر ناصرچغتائی،حاجی اکرم،محمدعمران،حسن ہمایوں حیدر،ملک مزمل بشیر ، حافظ اسداور ڈپٹی سیکریٹری لاہور زونل آفس طلحہٰ بن ظہیر بھی موجود تھے۔چیئرمین پی سی ڈی ایم اے شاہد وسیم نے توقع ظاہر کی کہ کاشف رضا اپنے تجربات کو بروئے کار لاتے ہوئے ممبران کے مسائل کے حل میں اہم کردار ادا کریں گے۔اُن کی تقرری حال ہی میں سبکدوش ہونے والے صدر ناصر چغتائی کی مدت پوری ہونے کے بعد عمل میں آئی ہے۔
اجلاس میں نادرن ریجن کے تمام ممبران سے کہا گیا ہے کہ وہ ایسوسی ایشن سے متعلق امور اور مسائل کے حل کے لیے لاہور زونل آفس کے نئے صدر سے رابطہ کریں تاکہ ممبران کودرپیش مسائل کا فوری ازالہ کیاجاسکے۔ ایگریکٹیو کمیٹی کی منظوری کے بعد کاشف رضاکی نامزدگی کا سرکلر بھی جاری کردیا گیاہے جس میں تمام ممبران کو آگاہی فراہم کرنے کے علاوہ کمرشل امپورٹرز کو درپیش مسائل کے حوالے سے تعاون اور تجاویز دینے کی بھی استدعا کی گئی ہے۔
